د احصايې او معلوماتو ملي ادارې د هېواد په کچه د روان کال د لړم مياشتې د صادراتو او وارداتو اړوند ارقام راټول او تحليل کړي دي، چې په ياده مياشت کې د هېواد په کچه د صادراتو ټول ارزښت ۲۲۷.۱ ميليون ډالر او د وارداتو ټول ارزښت ۶۸۱.۵ميليون ډالر ښودل شوی دی.
دا په داسې حال کې ده، چې تېر کال په لړم مياشت کې د هېواد د صادراتو ټول ارزښت ۲۰۱.۱ میلیون ډالر ته رسید، چې د روان کال د لړم مياشتې د صادراتو د ارقامو تحليل د تېر کال د همدې مياشتې د صادراتو په پرتله ۲۶ ميليون ډالره زیاتوالی ښيي.
همدارنګه د ۱۴۰۱ کال په لړم میاشت کې د هېواد د وارداتو ارزښت ۱۱۳۸.۱ میلیون ډالرو ته رسیده، چې د روان کال د لړم مياشتې کې ۴۵۶.۶ میلیون ډالره کموالی ښيي.
د ۱۴۰۲ کال په لړم مياشت کې تر ټولو زيات صادرات پاکستان، هند او چین هېوادونو ته شوي او د ۱۴۰۱ کال په همدې مياشت کې تر ټولو زيات صادرات پاکستان، هند او عربي متحده اماراتو ته وو.
همدا ډول د ۱۴۰۱ کال په لړم مياشت کې ترټولو زيات واردات له پاکستان، ایران او چین هېوادونو څخه وو او د روان کال په لړم مياشت کې تر ټولو ډېر واردات له پاکستان، ایران او متحده عربي اماراتو څخه ترسره شوي دي.
د یادونې وړ ده، چې صادراتو کې صادرات او بياځلي صادرات شامل دي او په وارداتو کې ټول محصولي او غير محصولي واردات حساب شوي دي.