د ریاست الوزرا اداري مرستیال مولوي عبدالسلام حنفي د بغلان، جوزجان او فاریاب ولایتونو یو شمېر علماوو سره لیدنه کړې.
د یادو ولایتونو علماوو د ټولنیز، اقتصادي او محلي حکومتولۍ وضعیت په اړه د ریاست الوزرا اداري مرستیال ته معلومات ورکړي.
علماوو ویلي، د اسلامي امارت د رهبرۍ د هڅو او کوښښونو او د مجاهدینو د سرښندنو په پایله کې بشپړ امنیت ټینګ شوی دی او مسولین پر وخت د خدمتونو رسولو او د هېوادوالو د ستونزو د حلولو کوښښ کوي.
دغه راز یې غوښتنه کړې؛ چې اسلامي امارت دې د مدرسو او ښوونځیو پیاوړتیا، د مجاهدینو وضعیت او ځوانانو ته د کاري فرصتونو رامنځته کولو ته ځانګړې پاملرنه وکړي.
د ریاست الوزرا اداري مرستیال مولوي عبدالسلام حنفي ویلي؛ د سراسري امنیت ټینګښت، د ټولنیزې هوساینې او شغلونو برابرول د اسلامي امارت له لومړیتوبونو څخه دي او په دې برخه کې خپلې هڅې نه درېغوي.
نوموړي زیاته کړې؛ اسلامي امارت به شویو وړاندیزونو ته رسېدنه وکړي او د هېواد له ټولو علماوو او مجاهدینو یې غوښتي، چې د اسلامي نظام او د بېلابېلو قومونو ترمنځ د یووالي په پیاوړتیا کې لا زیات هڅاند واوسي.