د ټولګټو وزارت ویلي؛ د ۱۴۰۳ هـ.ش. کال د اسد/زمري مياشتې له پيله تر پايه د ټولګټو وزارت د اوسپنې پټلۍ له لارې ۳۱۶ زره او ۷۴۳ مټریک ټنه انتقالات شوي دي.
یاد وزارت زیاته کړې؛ د حیرتان بندر له لارې ۲۵۵ زره او ۳۰۷ ټنه، د آقینې بندر له لارې ۲۷ زره او ۸۳۱ ټنه، د تورغونډۍ بندر له لارې ۲۹ زره او ۲۹ ټنه او د خواف-هرات بندر له لارې څلور زره او ۵۷۶ ټنه، چې ټولټال ۳۱۶ زره او ۷۴۳ مټریک ټنه نفتي، غیر نفتي او نور مواد دي، هېواد ته وارد او صادر شوي دي.
د دې وزارت د معلوماتو له مخې، د انتقالاتو له ډلې یوه برخه صادرات دي، په اسد مياشت کې ۱۶ زره او ۷۳۳ ټنه ټرانزيټ شوی، چې لویه برخه یې وچه مېوه، معدني ډبرې او د انارو جوس دي.
هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات، ترقۍ او ځان بسياينې ته لاره هواریږي.
د ټولګټو وزارت د اوسپنيزې کرښې معينيت هڅه کوي، ترڅو د لا زیاتو انتقالاتو لپاره مناسب شرایط برابر او سوداګرو ته لا زياتې اسانتياوې برابرې کړي.