د ریاستالوزرا اقتصادي مرستیال ملا عبدالغني برادر اخوند اوزبیکستان ته د خپل سفر پر مهال د ’ترمذ نړیوال سوداګریز مرکز‘ د پرانیستې په مناسبت د جوړو شوو مراسمو په څنډه کې د اوزبیکستان هېواد له لومړي وزیر عبدالله عارف اوف سره لیدنه کړې.
د لیدنې پر مهال د یاد هېواد لومړي وزیر ویلي، افغانستان د اوزبیکستان په بهرني سیاست کې مهم ځای لري او په همدې موخه تاشکند چمتو دی، چې له کابل سره د خپلو سوداګریزو او ترانزیټي اړیکو د پراخولو په موخه له خپلې خاورې په تېرېدو سره د منځنۍ اسیا هېوادونو ته د افغانستان د تازه میوو د صادراتو لپاره هر ډول اسانتیاوې رامنځته کړي.
ښاغلي عارف اوف زیاته کړې، اوزبیکستان له حیرتان څخه تر هرات پورې د اوسپنې پټلۍ شبکې د غځولو لپاره خپل تخنیکي ټیمونه معرفي کړي او چمتو دي، چې په راتلونکې سپټمبر میاشت کې د دغه پروژې د پيل او همدا راز د ګازو د ایستنې په موخه افغانستان ته راشي.
نوموړي ویلي، دوی چمتو دي چې له اسلامي امارت سره په همغږۍ د امو سیند د څنډو لپاره د استنادي دیوال جوړولو په برخه کې په ګډه کار وکړي.
د اوزبیکستان لومړي وزیر همدا راز اسلامي امارت ته بشپړ ډاډ ورکړی، چې کابل ته د نوموړي د وروستي سفر پر مهال بحث شوي موضوعات به ژره تر ژره عملي بڼه خپله کړي او په دې برخه کې د دواړو هېوادونو ګډ ټیمونه له نږدې کار کوي.
د ریاستالوزرا اقتصادي مرستیال ویلي؛ اسلامي امارت د ټولو هغو چارو د عملي پيل لپاره چمتو دی چې په خبره یې، هغه د دواړو هېوادونو د اړیکو په لا نږدې او پياوړي کولو کې رغنده رول لوبوي.