د کانونو او پټرولیم وزیر ملا هدایت الله بدري او ورسره مل پلاوي ترکمنستان ته د خپل سفر په ترڅ کې په جلا کتنو کې د یاد هېواد د بهرنیو چارو وزارت له وزیر، د کابینې مرستیال، د نفتو او ګازو وزیر، د ټاپي پروژې رییس، د صنعت او ښار جوړولو وزیر او د اوسپنې پټلۍ له رییس سره لیدنه کړې.
په دې لیدنه کې د ټاپي، ټاپ، ریل پټلۍ، نوري فایبر، د نفت او ګازو او سوداګریزې راکړې ورکړې په اړه خبرې شوې دي.
دغه راز یې د نفت او ګازو له وزیر او ټاپي پروژې له رییس سره په لیدنه کې د ټاپي پروژې سربېره د نفت او ګازو په اړه خپل نظرونه، وړاندیزونه شریک کړي دي.
سربېره پر دې د یاد هېواد د صنعت او ښار جوړولو وزیر د اوسپنې کانونو په برخه کې خپله لېوالتیا څرګنده کړې.
ملا هدایت الله بدري د اوسپنې کانونو په برخه د پانګونې په موخه د دوی د لېوالتیا ستاینه کړې او له خپل لوري یې ورسره د هر راز همکاریو ډاډ ورکړی.
دغه راز یې په هرات ولایت کې د یو ګډ کمپلکس د جوړېدو وړاندیز کړی.
د کانونو او پټرولیم وزیر د ترکمنستان د اوسپنې پټلۍ له رییس سره په جلا لیدنه کې د اوسپنې پټلۍ د ارزښت اهمیت په اړه خبرې کړي او غوښتنه یې کړې، چې د اوسپنې پټلۍ دې هرات او مزار ښار ته هم وغځول شي.
نوموړي زیاته کړې؛ دا نه یواځې د افغانستان لپاره مهم ده، بلکې د سیمې هېوادونو لپاره هم یو ښه زیری دی.