د زندانونو چارو د سمون ادارې عمومي رییس مولوي محمد یوسف مستري په خپل کاري دفتر کې د دفتر رییس قاري رحمت الله ګلزاد او د اقتصادي پروګرامونو او ستراتېژیکو اړیکو رییس عبیدالله اخلاص په شتون، د افغانستان لپاره د سره صلیب نړیوالې کمېټې (ای سي ار سي) له مرستیال او رییس مارټن ډي بویر، د زندانونو د فعالیتونو او همکاریو مشرې مارینا او د مشرتابه سلاکار عزت ګل سره لیدنه کړې.
په دې لیدنه کې دواړو لوریو پر خپلمنځي همغږۍ زیاتولو، یو له بل سره همکاریو او د زندانیانو لپاره د خدمتونو او مرستو ترڅنګ په راتلونکو پلانونو باندې خبرې کړي دي.
مولوي محمد یوسف مستري د یادې لیدنې په ترڅ کې د (ای سي ار سي) په ګډه همکارۍ د خوښۍ ترڅنګ د دوی له مخکینیو مرستو مننه کړې او له نړیوالو مرستندویه موسسو یې غوښتي، چې له دغې ادارې سره د مرستو په موخه د کړو ژمنو عملي کولو بهیر چټک کړي.
په ورته وخت کې، د سره صلیب نړیوالې کمېټې رییس مارټن ډي بویر هم د خپلو همکاریو پر دوام ټینګار کړی او د زندانونو چارو د سمون ادارې له لوري یې زندانیانو ته په ښه ډول د مرستو رسولو او وېشلو لپاره د همغږۍ او زمینې برابرولو په موخه خوښي څرګنده کړې ده.