د چاپېریال ساتنې ملي ادارې عمومي رییس مولوي مطیع الحق خالص په خپل کاري دفتر کې د اکشن ډیالوګ موسسې له ارشد سلاکار کمال اوکده سره په لیدنه کې د مختلفو چاپېریالي موضوعاتو په اړه هر اړخیزې خبرې کړې دي.
د چاپېریال ساتنې ملي ادارې عمومي رییس د اکشن ډیالوګ موسسې ارشد سلاکار هرکلی کړی او د افغانستان د چاپېریال وضعیت په تړاو یې هر اړخیز معلومات ورکړي دي.
د اکشن ډیالوګ موسسې ارشد سلاکار د خپلو کړنو او فعالیتونو په هکله راپور وړاندې کړی او ویلي يي دي، د چاپېریال ساتنې په برخه کې هر ډول همکارۍ ته چمتو دي.
نوموړي زیاته کړې؛ د سعودي عربستان او اندونیزیا له اړخه به دوی د دریم ګړي په حیث په نړیوالو غونډو او کنفرانسونو کې د افغانستان د استازو د ګډون لپاره اسانتیاوې برابرې کړي او هڅه به وکړي راتلونکي میاشت کې چې په قطر کې د افغانستان په تړاو کومه غونډه جوړیږي، د چاپېریال ساتنې ملي ادارې مسولینو ته د ګډون زمینه برابره کړي.
کمال اوکده ویلي، موږ پلان لرو چې د چاپېریال ساتنې او اقلیمي بدلون په تړاو دوه کنفرانسونه جوړ کړو.
ده همدا راز ژمنه کړې، چې اردن هېواد ته به د نوې کېدونکې انرژۍ په برخه کې د چاپېریال ساتنې ملي ادارې کارکوونکو ته د سفر کولو زمینه برابره کړي.
د دې ادارې عمومي رییس مولوي مطیع الحق خالص د اکشن ډیالوګ موسسې له استازو مننه کړې او ویلي يي دي، افغانستان ته د تېرو څو لسیزو جګړو او اشغال پر مهال د انساني ناورینونو سربېره د چاپېریال په برخه هم ډیر زیانونه اووښتي چې جبران یې ګډې همکارۍ ته اړتیا لري.
نوموړي هیله څرګنده کړې، چې بشري موضوعات باید سیاسي نه شي.
د دې لیدنې په ترڅ کې دواړو خواوو پر ګډه همکارۍ او ګډ کار ټینګار کړی او ژمنه یې کړې، چې د بشریت د ژغورنې لپاره به جدي هلې ځلې کوي او کوښښ به وکړي چې چاپېریالي موضوعات له سیاست څخه بېل شي.