د اطلاعاتو او کلتور وزير ملا خیرالله خیرخواه د روسيې هېواد سنټ پیټرزبورګ ښار کې د’ کلتوري اتحاد‘ ناسته کې د ګډون په موخه ياد هېواد ته په سفر تللی، چې د سفر په پای کې يې په مسکو کې د افغانستان په سفارت کې له مسکو ميشتو افغانانو سره لیدنه کړې.
په دې لیدنه کې ملا خیرالله خیرخواه ویلي؛ افغانستان له پینځو لسیزو جګړو وروسته د يو مقتدر مرکزي نظام څښتن شوی دی، د امنيت، ثبات، يووالي او ورور ولۍ له پاره زمينه برابره شوې ده، افغانستان د ټولو افغانانو ګډ کور او هويت دی.
نوموړي د افغانستان او روسيې اوسنۍ اړيکې ښې بللي او له ګاونډيو هېوادونو سره د دوستانه پياوړو اړيکو غوښتنه یې کړې.
د اطلاعاتو او کلتور وزير زياته کړې؛ اسلامي امارت په تېرو دريو کلونو کې په بېلا بيلو برخو کې لکه، اداري فساد او مخدره توکو سره د مبارزې برخو کې ډيرې لاسته راوړنې لري.
ښاغلي خیرخواه په مسکو کې د افغانستان سفارت په روسیه کې د ميشتو افغانانو کور او د سفارت کارکوونکي يې د خلکو خادمان بللي او د افغانانو تر منځ يې په يووالي او ورورولۍ ټينګار کړی.
د اطلاعاتو او کلتور وزير، دغه راز افغان کدرونه د هېواد ملي سرمايه بللې او غوښتنه یې کړې، چې خپل هېواد ته دې د خدمت په موخه راستانه شي.
ورته مهال مسکو کې مېشتو افغانانو د حکومتولۍ د بهبود او د اصيل افغاني کلتور د پراختيا او تقويې په موخه خپلې غوښتنې او وړانديزونه شريک کړي او روسيه کې يې د يو کلتوري مرکز د جوړولو غوښتنه کړې، چې د اطلاعاتو او کلتور وزیر ورته د کلتوري مرکز جوړولو برخه کې د هر اړخيزې همکارۍ ډاډ ورکړی دی.