لبنان کې پرون (چهارشنبه، د وږي ۲۸مه) یو ځل بیا مخابراتي وسایلو (پېجرونو) چاودنې کړې دي.
د لبنان روغتیا وزارت وايي، چې په دې چاودنو کې ۲۰ کسانو ژوند بایللی او لږ تر لږه ۴۵۰ نور ټپيان شوي دي.
دا د مخابراتي وسایلو دویمه چاودنه ده، چې لبنان کې ګڼو کسانو ته مرګژوبله اړوي.
له دې پېښې یوه ورځ وړاندې (سېشنبه، د سپټمبر په ۱۷مه) د لبنان په بېلابېلو سیمو کې ارتباطي وسیلو (پېجرونو) چاودنه کړې وه، چې د دوو ماشومانو په ګډون ۱۲ کسانو ژوند پکې بایللی و او لږ تر لږه ۲ زره او ۷۵۰ نور پکې ټپیان شوي وو.
د ایراني رسنیو د راپورونو له مخې، لبنان کې د ایران سفیر مجتبی اماني هم په دې پېښه کې ټپي شوی و.
د لبنان حزبالله غورځنګ او ایران د دې چاودنو پړه پر اسرائیلو اچولې ده.
لبنان کې د پېجرونو چاودنو ته ګڼو هېوادونو غبرګونونه ښودلي دي.
د روسیې بهرنیو چارو وزارت دا پېښه د نړیوالو قوانینو پر وړاندې یوه جدي ننګونه بللې ده.
د یاد وزارت ویاندې ویلي، چې د دې برید تنظیموونکو په قصدي ډول په منځني ختیځ کې د لویې جګړې رامنځته کولو هڅه کړې ده.
د ترکیې ولسمشر رجب طیب اردوغان د لبنان د لومړي وزیر له مرستیال نجیب میقاتي سره په ټیلیفوني خبرو کې د دې چاودنو په تړاو خواشیني څرګنده کړې ده.
د ایرلینډ د لومړي وزیر مرستیال دا د جینوا کنوانسیون څخه سرغړونه ګڼلې ده.