د ریاست الوزرا اداري مرستیال مولوي عبدالسلام حنفي د پکتیکا ولایت یو شمېر علماوو او متنفذینو سره لیدنه کړې.
په دې لیدنه کې یادو علماوو او متنفذینو د پکتیکا ولایت د ټولنیزو، اقتصادي او امنیتي وضعیت په اړه د ریاست الوزرا اقتصادي اداري مرستیال سره ته معلومات ورکړي.
د پکتیکا ولایت علماوو او متنفذینو د خلکو د امنیت او هوساینې د ټینګښت په برخه کې د اسلامي امارت د مسولینو له زحمتونو او کوښښونو قدرداني کړی او د مدرسو، ښوونځیو، روغتیا، مواصلاتي لارو او د پراختیایي پروژو او پراختیایي چارو موضوعات یاد کړل او د اسلامي امارت له مسولینو یې غوښتي، چې په دې اړه ځانګړې پاملرنه وکړي.
د ریاست الوزرا اداري مرستیال مولوي عبدالسلام حنفي د پکتیکا ولایت علماوو او متنفذینو سره په لیدنې د خوښي څرګندولو ترڅنګ ویلي؛ د امنیت ټینګښت او په بېلا بېلو برخو کې هېوادوالو ته د خدماتو، ارامي او هوساینې برابرول، د اسلامي امارت له دندو څخه دي او مسولین په دې برخو کې خپلې هڅې نه درېغوي.
مولوي عبدالسلام حنفي د یادو علماوو او متنفذینو له لوري د مطرح شویو موضوعاتو په اړه زیاته کړې، اسلامي امارت به شته امکاناتو ته په پام پورتنیو مواردو ته رسېدنه وکړي.