د چاپېریال ساتنې ملي ادارې عمومي رییس مولوي مطیع الحق خالص نن د ۱۴۰۳کال د تلې په لومړۍ نېټه د افغانستان لپاره د چین له سفیر ژاو شینګ سره په خپل کاري دفتر کې لیدنه وکړه، چې پر یو لړ مهمو چاپېریالي موضوعاتو هر اړخیز بحث او خبرې وشوې.
په پیل کې د چاپېریال ساتنې ملي ادارې عمومي رییس د چین سفیر ته ښه راغلاست ووایه او مننه یې ترې وکړه، چې د چين له افغانستان سره په مختلفو برخو کې همکاري کوي.
مولوي مطیع الحق خالص په خپلو خبرو کې وویل؛ افغانانو د تېرو څو لسیزو جګړو له امله په هره برخه کې ډیر زیانونه لیدلي، چې د افغانستان چاپېریالي وضعیت، ځنګلونو او وحشي ژوو ته هم زیات زیان اوښتی او په دې برخه کې یې د یو لړ همکاریو غوښتنه وکړه.
ښاغلي خالص زیاته کړه، له اقلیمي بدلون سره د مبارزې او سازښت په برخه کې که د رهبرۍ په کچه چین هېواد ته د دې ادارې د مسولینو د سفر زمینه برابره شي؛ نو د سوداګرو د لیږد په برخه کې به ګټوره وي.
نوموړي زیاته کړه؛ د چاپېریال ساتنې ملي اداره دا مهال د ۱۶چاپېریالي کنوانسیونونو غړیتوب لري، چې له بده مرغه په نړیوالو چاپېریالي کنفرانسونو او غونډو کې ورته د ګډون بلنه نه ورکول کيږي، په نړیواله کچه د چین هېواد اغېزمنتیا ته په کتو باید په نړیوالو چاپېریالي غونډو کې د دې ادارې د مسولینو د سفر زمینه برابره شي؛ ترڅو وکولی شي د افغانانو ستونزې تر نړیوالو ورسیږي.
د دې ادارې عمومي رییس زیاته کړه؛ له بده مرغه د افغانستان ولسونه له اقلیمي بدلون څخه زیات اغیزمن شوي دي او نړیوالو دې موضوع ته سیاسي رنګ ورکړی او افغانستان ته په نړیوالو غونډو کې د ګډون حق نه ورکوي.
نوموړي وویل؛ که د اقلیمي بدلون له امله افغانان زیات زیانمن شي او نړیوال یې لاسنیوی و نه کړي، نو نړیواالو ته به یې هم ډیر زیانونه ورسیږي، چي بیا به یې جبران ډېر سخت او په یوه لویه ننګونه بدل شي.
ښاغلي خالص د چین له سفیر څخه په تخنیکي برخه کې د چاپېریال ساتنې ملي ادارې د تجهیز، په ځنګلونو کې د اورلګېدنې د خبرداري او اور وژنې سیسټمونو فعالولو او پاکې انرژۍ په برخه کې د همکارۍ غوښتنه وکړه.
د افغانستان لپاره د چین سفیر ژاو شینګ د خپلو خبرو پرمهال وویل، چین او افغانستان هغه دوه دوست هېوادونه دي چې اوږده ملګرتیا او ښې تاریخي اړیکې لري.
نوموړي زیاته کړه؛ چین په نړیواله کچه لومړنی هېواد دی چې په سیاسي، اقتصادي او امنیتي برخو کې له افغانستان سره همکاري کوي او همدا راز چین د افغانستان په مقابل کې ښه سیاست ته ژمن هېواد دی.
نوموړي د هر ډول همکارۍ ژمنه کړې او زیاته یې کړه، چې په نړیواله کچه هم موږ د افغانستان ملاتړ کړی او کوو یې. نوموړي هيله ښودلې، چې زموږ اړیکې باید نورې هم وغوړیږي.
ښاغلي ژاو شینګ وویل؛ د امریکا لخوا د ۲۰ کلن اشغال په اوږدو کې د نورو ناخوالو سربېره د افغانستان چاپېریال هم ډیره صدمه ولیده، لازمه ده چې امریکا د دوی لخوا ترسره شوي زیانونه جبران کړي.
د لیدنې په پای کې دواړو خواوو په دوامداره لیدنو او ګډه همکارۍ ټینګار وکړ.