د الجزیرې خبري شبکې د راپور له مخې، اسرائیلي یرغلګرو په تېرو ۲۴ ساعتونو کې د غزې پر بېلابېلو سیمو بریدونه کړي، چې لږ تر لږه ۵۳ فلسطینیان پکې شهیدان شوي دي.
په دې بریدونو کې د رفح ښار په شمال کې یو کور هم په نښه شوی، چې یوه مور او پینځه ماشومان یې پکې شهیدان شوي.
دغهراز د مرکزي غزې په نصیرات کمپ کې د بېځایه شویو پر خیمو هوايي برید شوی، چې لږ تر لږه دوه فلسطینیان پکې شهیدان او ګڼ نور ټپیان شوي.
د غزې په شمال کې هم یو کور په نښه شوی، چې یو فلسطیني پکې شهید او نور ټپيان شوي دي.
غزه کې د اسرائیلي یرغلګرو بریدونه او وحشتونه لا هم دوام لري او هره ورځ لسګونه فلسطینیان پکې شهیدان او ټپيان کېږي.
د فلسطین روغتیا وزارت د تازه معلوماتو له مخې، پر غزه د صهیونیستی رژیم د بریدونو له پیل راهیسې ۴۱ زره او ۴۹۵ فلسطینیان شهیدان او ۹۶ زره او ۶ نور ټپیان شوي دي.