د شهیدانو او معلولینو چارو وزارت مرستیال شېخ عبدالحکیم حقاني د ترکیې هېواد د ندا الخیر موسسې له مشر حمزه کوکسال سره په خپل کاري دفتر کې لیدنه کړې.
په دې لیدنه کې د دې وزارت د دفتر رییس مولوي شاه محمد دوست، د ټولنیزو خدمتونو د تنظیم رییس مولوي ثناء الله فرقاني، د ترکیې هېواد د انقرې ښار د سرې میاشتې ټولنې رییس محمد سیلای او د یاد هېواد یو شمېر سوداګرو شتون درلود.
شېخ عبدالحکیم حقاني په اوسني عصر کې د مسلمانانو د یووالي او پيوستون په اړتیا خبرې کړي او ویلي یې دي؛ د فلسطین مظلوم ولس نن د یهودیانو د ظلم په اور کې سوځي او د افغانستان خلک د نورو هېوادونو په پرتله دا موضوع ښه درک کولی شي، ځکه چې د دې خاورې خلک د تېرو څو لسیزو په جګړو کې له ورته ظلمونو او ستونزو سره مخ وو، او اسلامي نړۍ نن ورځ د پخوا په پرتله پیوستون او یووالي ته ډیره اړتیا لري.
نوموړي همداراز زیاته کړې؛ د افغانستان د خلکو د جهاد اصلي موخه په دې هېواد کې د اسلامي نظام ټینګښت وو، نن د اسلامي امارت مجاهدین دغې موخې ته ورسید او ستاسو څخه مو هیله دا ده، چې د اسلامي امارت ښه انځور د تركيې ولس ته وړاندې كړې تر څو کوم منفي ذهنیتونه چې د ځینو ډلو لخوا رامنځته شوي هغه بدلون ومومي.
شېخ عبدالحکیم حقاني مستحقینو ته د مرستو رسولو په برخه کې د بشپړ شفافیت ډاډ ورکړی او ویلي يې دي؛ د شهیدانو او معلولینو چارو وزارت د اسلامي امارت د شهیدانو ورثه و، معلولینو او دغه راز د تېرې ادارې یتیمانو، کونډو او معلولینو ته یو ډول میاشتنې نغدي مرستې ورکوي.
د شهیدانو او معلولینو چارو وزارت مرستیال له یاد پلاوي څخه غوښتي، چې یتیمانو ته د فني او حرفوي زده کړو او معلولینو ته د مصنوعي غړو جوړونې، د برېښنایي ویلچرونو چمتو کولو او همداراز د ژوند په نورو برخو کې اړینې اسانتیاوې رامنځته کړي.
په ورته وخت کې د ترکیې هېواد د ندا الخیر موسسې مشر او پلاوي په افغانستان کې د اسلامي نظام رامنځته کیدل یې د ټولو اسلامي هېوادونو لپاره یوه ښه بیلګه بللې او ویلي يې دي، د ټولې نړۍ مسلمانان په دې هېواد کې د اسلامي نظام له رامنځته کېدو سره خوشحاله دي او د لوی خدای جل جلاله په مرسته به، په دې هېواد کې شته اقتصادي او ټولنیزې ستونزې هم حل شي.
همداراز یاد پلاوي یتیمانو، کونډو او معلولینو ته د مرستو برابرولو په برخه کې د هر اړخیزې همکارۍ ژمنه کړې.