اطلاعاتو او کلتور وزارت وايي، چې د دې وزارت د خپرونو چارو د معينيت سرپرست او د کمېسیون مرستیال مولوي ضياءالحق حقمل په مشرۍ د رسنیزو سرغړونو ارزونې کمېسیون نوبتي غونډه وکړه.
په دې غونډه کې د خپرونو چارو معینیت سرپرست مولوي ضیاءالحق حقمل پيلیزه وينا کړې او د تیرې غونډې د پریکړو ارزونه يې کړې ده.
همدا راز کمېسیون ته وړاندې شوې ستونزې او شکایتونه څیړل شوي او له رسنیو سره د کېدونکو مرستو د روڼتیا په لارو چارو خبرې شوي، چې په اړه يې اړینې پریکړې شوې دي.
همدا راز په دې غونډه کې په ځینو ولایتونو کې د رسنیزو ستونزو د حل په موخه کمېته ټاکل شوې، ترڅو اړوندو ولایتونو ته سفر وکړي، ستونزې له نږدې وڅېړي او وروستيو پريکړو لپاره خپل راپورونه له کمېسیون سره شریک کړي.