د اطلاعاتو او کلتور وزير ملا خیرالله خیرخواه هرات ولايت ته د سفر په لړ کې د خبريالانو او رسنيو له مسولينو سره د ليدنې په ترڅ کې د دوی بېلابېلې ستونزې اوریدلي او د حل کولو ډاډ يې ورکړی دی.
ملا خیرالله خیرخواه د رسنيو د اقتصادي ستونزو په اړه ویلي؛ د هرات د رسنيو مسولین او خبريالان دې خپل يو تن استازی وټاکي، چې دا موضوع د اطلاعاتو او کلتور وزارت سره تعقیب او په ګډه ورته د حل لار پيدا کړي.
ښاغلي خيرخواه د هرات د رسنيو له مسولینو او خبريالانو غوښتي، چې په بېلابيلو برخو کې د هېواد د پرمختګونو په اړه فعاليت ترسره کړي.
د رسنيو مسولینو او خبريالانو اطلاعاتو ته د لاسرسي او د مالي ملاتړ برخو کې د اسانتياو رامنځته کولو باندې ټينګار کړی.
هرات کې د خبريالانو او رسنيو د ملاتړ او څارنې کمېټې غړي شميل احمد مشعل ویلي؛ هرات کې نسبت نورو ولايتونو ته اطلاعاتو ته د لاسرسي وضعيت بهتر دی، نوموړي د اطلاعاتو او کلتور وزارت څخه غوښتي، چې مخابراتو وزارت ته د رسنيو د فريکونسي قيمتونو د کمولو برخه کې جدي توجه وکړي.
د هرات د اطلاعاتو او کلتور رییس مولوي احمد اللّٰه متقي ویلي؛ د رسنيو او خبريالانو ستونزو ته به رسېدنه کېږي او د رسنيو د ستونزو په اړه یې د اطلاعاتو او کلتور وزارت جدي پاملرنې غوښتنه کړې.
د يادونې وړ ده، چې د خبريالانو او رسنيو د ملاتړ او څارنې کمېټې د معلوماتو پر بنسټ لويديځه حوزه کې شاوخوا ۶۵ تصويري، غږيزې او چاپي رسنۍ فعاليت کوي.