د ریاست الوزرا دفتر عمومي رییس ډاکټر ملا عبدالواسع د کابل د ارغندې سیمې له یو شمېر مشرانو سره لیدنه کړې.
په دې لیدنه کې کې یادو قومي مشرانو اسلامي امارت ته د هر راز همکاریو او ملاتړ ډاډ ورکړی.
دوی د هېواد په بېلا بېلو برخو کې د اسلامي امارت له لوري د لویو او پراختیایي پروژو په پیل لیدو خوښي ښودلې او په ارغندي کې یې هم د ښوونځیو او مدرسو، روغتیایي روغتونونو، د برېښنا وېش او د اوبو لګولو سیستم په برخو کې د پروژو د پلي کېدو غوښتنې کړي.
ډاکټر ملا عبدالواسع ویلي، په ټول هېواد کې دا مهال د اوبو بندونو او سړکونو جوړولو په ګډون پر لویو پروژو چارې روانې دي او اسلامي امارت دغه ټولې پروژې په داخلي عوایدو پلي کوي.
نوموړي زیاته کړې، د افغانستان د ستونزو حل او بیارغونې په برخو کې ملت او امارت سره په ګډه همکار دي او د لومړیتوبونو په نظر کې نیولو سره به چارې ترسره کوو.
دغهراز د ریاست الوزرا دفتر عمومي رییس د ارغندې سیمې مشرانو ته ډاډ ورکړی، چې د امکاناتو په چوکاټ کې به یې اسلامي امارت په غوښتنو او وړاندیزونو غور وکړي.