د چاپېریال ساتنې ملي ادارې عمومي رییس مولوي مطیع الحق خالص ننګرهار ولایت ته د خپل سفر په لړ کې د دې ولایت د پچیراګام ولسوالۍ د چاپېریالي وضعیت د اروزنې په موخه یادې ولسوالۍ ته سفر کړی.
مولوي مطیع الحق خالص د پچیراګام ولسوالۍ له خلکو سره د تورې بورې او شاو خوا سیمو د طبیعي او معنوي ښکلا، د بارانونو، طوفانو او نورو افاتو مخنيوي او کمښت کې د طبیعي ځنګلونو د اهمیت، د وحشي حیواناتو او الوتونکو د ساتنې او ښکار د مخنيوی په اړه هر اړخیزې خبرې کړي دي.
نوموړي ویلي؛ دا سیمه ځانګړي ارزښتونه لري او د سیمې ارزښتونو د ساتنې په خاطر يې د موسساتو او سیلانیانو د جلبولو په موخه کار کړی او هم يې ځینې موسساتو سره خبرې کړي، ترڅو د پاکې انرژۍ برابرولو، د ځنګلونو بیارغولو، بدیل معیشیت پروګرامونو پلي کولو او د وحشي حیواناتو د ساتنې او تقویې پروګرامونه کړي، چې د یادې سیمې د خلکو اقتصادي وضع ښه شې او په طبیعي ځنګلونو او د سیمې په طبیعې ښکلا باندې يې فشار کم شي.
دغهراز ښاغلي خالص په خپلو خبرو کې پر نړیوالو غږ کړی، چې د یوه شريک چاپيریال اوسیدونکی یو او تر ډيره افغانستان د چاپېریال په خرابوالي کې ښکیل نه دی، خو د زیانونو سره يې مخ دی چې بايد د دې حق راکړل شي.
د چاپېریال ساتنې ملي ادارې عمومي رییس ټینګارکړی، چاپېریال یوه بشري موضوع ده او باید د سیاست برخه و نه ګرځول شي.
په ورته وخت کې مولوي مطیع الحق خالص د قومي مشرانو غوښتنې اوریدلي او د خپل مسولیت په برخه کې يې د ترسره کولو او نورو اړوند مسولینو ته یې د غږ رسولو ډاډ څرګند کړی دی.