د فلسطین روغتیا وزارت وايي، چې پر غزه د صهیونیستي رژیم د بریدونو له امله په تېرو ۲۴ ساعتونو کې ۵۱ فلسطینیان شهیدان او ۸۲ نور ټپیان شوي دي.
یاد وزارت زیاتوي؛ د تېر کال د اکټوبر له ۷مې راهیسې، چې اسرائیلي یرغلګرو پر غزه تړانګه بریدونه پیل کړي، لږ تر لږه ۴۱ زره او ۶۸۹ فلسطینیان شهیدان او ۹۶ زره او ۶۲۵ نور ټپیان شوي دي.
اسرائیلي یرغلګرو غزه کې خپلو وحشتونو ته دوام ورکړی او په فلسطینیانو یې خپله سیمه سور تنور ګرځولې ده. هېڅ ځای امن نه دی، تر دې چې د بېځایه شویو فلسطینیانو پر ښوونځیو او خوندي اعلان شویو سیمو هم بریدونه کېږي.
صهیونیستي یرغلګرو نن سهار هم د فلسطیني کډوالو او بېځایه شویو پر دوو ښوونځیو برید کړی، چې لږ تر لږه ۹ فلسطینیان پکې شهیدان او لسګونه نور ټپیان شوي دي.