د زندانونو چارو د سمون ادارې عمومي رییس مولوي محمد یوسف مستري د افغانستان لپاره د یوناما له مشرې مېرمن روزا اوتنبایوا او مل پلاوي سره په خپل کاري دفتر کې لیدنه کړې.
دواړو خواوو په دې لیدنه کې د ښځینه او نارینه زندانیانو د انساني حقونو، ښوونې او بیاروزنې، دیني، عصري او حرفوي زده کړو، مهارتونو او روغتیایي خدمتونو د څرنګوالي په اړه هر اړخیزې خبرې کړې دي.
مولوي محمدیوسف مستري ډاډ څرګند کړی، چې د دې ادارې رهبري، مسولین او پرسونل د اسلامي امارت د مشرتابه (حفظه الله) له خوا یادې ادارې ته د زندانیانو د ښه ساتلو اړوند د استول شوې ۳۹ ماده ییزې کړنلارې له مخې د ازادۍ سلب په ټولو اړوندو مرکزونو کې د ښځينه او نارینه محبوسینو، توقیفیانو او محجوزینو انساني حقونو ته درناوی کوي او تر خپلې وسې زیات یې هغوی ته په روغتیايي، اعاشوي، اباتوي، ښوونيزو او روزنیزو، حرفوي، ورزشي او نورو اړتیا وړ برخو کې لازمې اسانتیاوې برابرې کړې دي.
نوموړي زیاته کړې؛ سره د دې چې د یوناما د دفتر اړوند څانګې (UNISEF, UNODC, UNWOMEN) او د سره صلیب نړیوالې کمېټې (ICRC) او نور مرستندویه همکار بنسټونه د زندانونو چارو د سمون ادارې اړوند د مرکز او ولایتونو زندانونو سره په بېلابېلو برخو کې همکاري لري، خو موږ هیله لرو چې د مرستو دا لړۍ لا نوره هم وغځېږي او دوام ومومي.
په ورته مهال، افغانستان کې د یوناما دفتر مشرې مېرمن اوتنبایوا او مل پلاوي یې ډاډ ورکړی، چې دوی به د تېر په څېر له دغې ادارې سره خپلو همکاریو ته دوام ورکوي.
تر یادې لیدنې وروسته، یاد پلاوی د دې ادارې د رهبرۍ په ملتیا، د کابل ولایت د ښځینه محبس د محبوسینو او د توقیفخونې توقیفیانو د وضعیت د ارزونې په موخه د هغوی سلولونه، خونې، خوړنځي، طعامخانه او نورې خدماتي برخې او چارې ارزولي، د ښځينه محبوسینو او توقیفیانو غوښتنې او وړاندیزونه یې اوریدلي او د هغوی د وضعیت له ښه والي یې ډاډ او رضایت ترلاسه کړی دی.
دغه راز د افغانستان لپاره د یوناما دفتر مشرې مېرمن روزا اوتنبایوا د زندانونو چارو د سمون ادارې له رهبرۍ څخه د خوښۍ په څرګندولو وویل، دې ادارې تل نړیوالو همکارو بنسټونو ته له زندانونو څخه د کتنې او ارزونې زمینه برابرې کړې او له نېکه مرغه نوموړو بنسټونو هم د زندانیانو وضعیت له نږدې ارزولې او ډاډمن شوي دي.