خلیل الرحمن حقاني په افغانستان کې د اروپایي ټولنې سفیرې سره په لیدنه کې د کډوالو په ستونزو خبرې کړي

په افغانستان کې د اروپایي ټولنې سفیرې ویرونیکا د کډوالو او راستنېدونکو چارو له وزیر خلیل الرحمن حقاني سره په خپل کاري دفتر کې لیدنه کړې.
په دې لیدنه کې په پاکستان او ایران کې د کډوالو په ستونزو، د جرمني او نورو اروپایي هېوادونو لخوا د کډوالو د جبري ایستلو یا نورو هېوادونو ته د لیږدولو، د داخلي بېځایه شوو د پایدار ادغام او هغوی ته د مرستو جلبولو په اړه خبرې شوي.
د کډوالو او راستنېدونکو وزیر د کډوالو په برخه کې د اروپایي ټولنې د مرستو مننه کړې او ویلي یې دي؛ چې د کډوالو په نوم کېدونکې مرستې دې مستقیما کډوالو ته ورکړل شي او باید په اساسي کارونو، سرپناه، کاري زمینو او اقتصادي ملاتړ کې ولګول شي.
په افغانستان کې د اروپایي ټولنې سفیرې ویرونیکا د کډوالو ستونزو ته رسېدنه د ټولو ګډ مسولیت بللی او ویلي یې دي، مونږ د کډوالو او نورو اړمنو د لاسنیوي لپاره د ملګرو ملتونو له مرستندويه ادارو سره ۱۲۵ میلیونه یورو مرسته کړې ده او د کال ترپایه به ٣٦ میلیونه نوره مرسته هم ورسره وکړو.
دغه‌راز دواړو لوریو د یوه ګډ میکانیزم رامنځته کولو لپاره د ګډې تخنیکي کمېټې په جوړولو پریکړه کړې.