د هرات د ملي موزیم او ارشیف مسولین وايي، په میاشتني ډول تر یو زر او ۵۰۰ ډېر کورني سېلانیان د دغه ولایت له موزیم څخه لیدنه کوي.
د هرات د موزیم او ارشیف مدير عبدالجبار نورزی وايي، د روان کال په لومړیو شپږو میاشتو کې د تېر کال په پرتله د سېلانیانو شمېر ډېر شوی دی.
هرات موزيم ته د علمي ليدنې په موخه د يوه ښوونځي زده کوونکي تللي او په اړه یې وايي؛ تاريخ په کتابونو کې د تيوري په بڼه لوستل کېږي، خو له نږدې او مخامخ د تاريخي اثارو او ځايونو ليدنه د دې سبب کيږي، چې په ښه شکل سره په ذهن کې پاتې شي او تر څنګ يې د اسلافو د تاريخ او کلتور په پېژندنه کې له زده کوونکو سره ډيره مرسته کيږي.
دوی زیاتوي، علمي سفرونه د زده کوونکو ذهنونه فعالوي او تخلیقي او څیړونکي اشخاص ترې جوړوي.
د يادونې وړ ده، چې د هرات ملي موزيم له کابل موزيم وروسته په هېواد کې تر ټولو ستر موزيم دى، چې درې زره کلن تاريخي او لرغوني اثار پکې ساتل کېږي.