د افغانستان اسلامي امارت د کابینې اتمه غونډه د رییس الوزرا الحاج ملا محمدحسن اخند په مشري پرون دوشنبه ترسره او د يو شمېر موضوعاتو په اړه بحث او پرېکړې پکې وشوې.
د کابينې دا غونډه چې د قرانکريم د څو مبارکو ایتونو په تلاوت پيل شوه، له اجنډا سره سم د فرامینو او حکمونو د تعقیب او نظارت لوی رییس مولوي شمس الدین شریعتي په مشري پلاوي ته دنده وسپارل شوه، چې هېواد ته د بېکیفیته تېلو د وارداتو مخنیوي اړوند دې د اقتصادي معاونیت د طرحې په پام کې نيولو سره هر اړخیزه څېړنه وکړي او وروستی راپور دې د کابینې غونډې ته وړاندې کړي.
همدا راز د کورنیو چارو وزارت په مشري یوه پلاوي ته دنده وسپارل شوه، چې هېواد ته د رکشو واردولو او په ښارونو کې د ګرځېدو اړوند یوه طرحه جوړه او پایله دې یې د کابینې غونډې ته وړاندې کړي.
د کابينې دا غونډه د خير په دعا پای ته ورسېده.