د عالیقدر اميرالمؤمنين حفظه الله د فرمان پر اساس د کډوالو د دايمي استوګنو لپاره د شهرکونو جوړولو د طرحې او طرزالعمل د تطبيق په موخه ناسته وشوه.
د افغانستان اسلامي امارت د کليو، بیارغونې او پراختيا وزير الحاج ملا محمد يونس اخندزاده او د کرنې، اوبو لګولو او مالدارۍ وزير مولوي عطاءالله عمري غزني ولايت ته د کډوالو د دايمي استوګنځيو لپاره د شهرکونو جوړولو د طرحې او طرزالعمل د غوره تطبيق په موخه سفر کړی.
دې پلاوي د خپل سفر په ترڅ کې د ياد ولايت له والي حافظ محمد امین عمري او د اړوند ادارو له مسولينو سره ناسته کړې.
دوی ویلي؛ د عالیقدر اميرالمؤمنين حفظه الله د فرمان پر اساس هغو کډوالو ته، چې ځمکې نه لري د دایمي استوګنو جوړولو لپاره د ځمکو د تشخيص، تثبيت او ورکړې په موخه يو طرزالعمل لېږل شوی، چې له مخې به يې ټولو بېسرپناه او د طرزالعمل مطابق کډوالو ته د اوسېدو ځایونه ورکړل شي.
د ياد طرزالعمل د غوره تطبيق په موخه د غزني د والي حافظ محمد امین عمري تر مشرۍ لاندې يوه کمېټه ټاکل شوې، چې د بېلابېلو ادارو مسولين يې غړيتوب لري، تر څو د مهاجرينو د دايمي سکونت لپاره ښارګوټي جوړ او په دې برخه کې شته ستونزې له منځه يوسي.
نوموړي پلاوي ته ډاډ ورکړی، چې په ياد ولايت کې به د مشرتابه محترم مقام د حکم د غوره تطبيق په موخه د کډوالو د دايمي اسکان لپاره د ښارګوټي نقشه، د ځمکې بررسي او اړوند چارې پر وخت سرته ورسوي.
له له ګاونډیو هېوادونو زرګونه افغان کډوال په جبري ډول را ایستل شوي، چې د اسلامي امارت له لوري یې په ښه ډول مدیریت شوی او د یاد طرزالعمل په پلي کولو سره به لا نورې اساسي اسانتیاوې ورته رامنځته شي.