د ریاست الوزرا سیاسي مرستیال مولوي عبدالکبیر په افغانستان کې د خصوصي پوهنتونونو له یو شمېر مسولینو او استازو سره لیدنه کړې.
په دې لیدنه کې د خصوصي پوهنتونونو مسولینو او استازو د هېواد د تحصیلي او پوهنیز سکتور په استازولۍ د سیاسي معاونیت له همکاریو مننه کړې او ویلي یې دي، وخت ناوخت یې د اسلامي امارت د مشرانو لخوا غږ اورېدل شوی دی.
د خصوصي پوهنتونونو استازو په افغانستان کې خصوصي تحصيلي او ښوونیز سکتور د ځوان نسل د روزنې په برخه کې ارزښتمن بللی او ویلي يي دي، دا مهال په خصوصي پوهنتونونو او د لوړو زده کړو په تحصیلي موسسو کې د زرګونو استادانو د بوختیا ترڅنګ سلګونه زره محصلین په زده کړو بوخت دي.
یادو مسولینو زیاته کړې، په تدریجي ډول به د افغانستان د خصوصي پوهنتونونو حالت له نړیوالو تحصیلي بنسټونو سره برابر شي او په دې برخه کې د اسلامي امارت په همکارۍ ډېرې هڅې شوې دي.
دغهراز د خصوصي پوهنتونونو مسولینو خپلې ستونزې د ریاست الوزرا سیاسي مرستیال سره شریکې کړي او وړاندېز یې کړی، چې په هېواد کې دې د خصوصي تحصیلي او ښوونیز سکتور د لاملاتړ په موخه څو اړخېزه کمېټه جوړه شي، چې د اړتیا په صورت کې ناستې ولري.
د ریاست الوزرا سیاسي مرستیال مولوي عبدالکبیر د پوهنتونونو استازو ته ښه راغلاست ترڅنګ د خصوصي پوهنتونونو او تحصیلي بنسټونو شتون مهم یاد کړی، چې د نوي نسل په روزنه کې مهمه ونډه لري.
مولوي عبدالکبیر ویلي، اسلامي امارت د علم او زده کړو ملاتړی دی او هڅه کوي چې خصوصي سکتور ته غوره امکانات برابر کړي.
نوموړي زیاته کړې، اسلامي امارت دیني او عصري زده کړو ته ارزښت ورکوي او له همدې امله د دیني او عصري علومو ترمنځ واټن او تضاد له منځه تللی دی.
مولوي عبدالکبیر د پوهنتونونو مسولینو او استازو ته په خطاب کې ویلي، د هغوی پر وړاندېزونو به غور او د ستونزو د حل هڅې به وشي.
د ناستې په پای کې سیاسي مرستیال یادونه کړې، د اسلامي امارت لومړنۍ موخې تر لاسه شوې او دا مهال له ګاوڼدیو، سیمې او نړۍ سره د اسلامي امارت اړیکې په ښه حالت کې دي.