د اسلامي امارت مرستیال ویاند ملا حمدالله فطرت وايي؛ چې د افغانستان اسلامي امارت د ریاست الوزرا مقام له لوري، څو ورځې وړاندې د ایران او پاکستان پر پوله د یو شمېر هېوادوالو د مرګ ژوبلې د راپورونو په اړه د پلټنو په موخه هیئت وټاکل شو.
نوموړي زیاته کړې؛ هیئت د کورنیو چارو وزارت امنیتي مرستیال ملامحمد ابراهیم صدر په مشرۍ چې د ملي دفاع، بهرنیو چارو او سرحدونو او قبایلو چارو وزارتونو او د استخباراتو لوی ریاست استازو یې ملتیا کوله، کار پیل کړ.
د ښاغلي فطرت په وینا؛ تر دې دمه د موضوع په اړه د را رسېدلو شواهدو په اساس د ایران په خاوره کلګان دره کې زموږ پر يو شمير هېوادوالو چاودنې او ډزې شوې دي، چې تر دې مهاله د دې غمجنې پېښې د دو تنو شهیدانو جسدونه او ۳۴ تنه عيني شاهدان چې ځیني يې په پيښه کې ټپيان شوي دي، د هیئت له لوري را انتقال شوي؛ ځینې نور يې لا هم په ايران او پاکستان کې دي چې هیئت یې په موندلو او انتقالولو بوخت دی.
نوموړي همداراز ویلي؛ د پېښې پوره تحقيقات لا هم نه دي بشپړ شوي او هيئت په دې اړه کار کوي، وروستي جزيات به د څيړنو له پایته رسېدو وروسته بیا خپاره شي.