د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني د چین په بیجینګ ښار کې د فقر کمولو او کرنې پرمختګ نړیوال کنفرانس ته وینا وکړه، چې پکې د بېلابېلو هېوادونو د کرنې مسولینو ګډون درلود.
مولوي صدراعظم عثماني په خپلو خبرو کې د هغو هېوادونو د ملاتړ پر اهمیت ټینګار وکړ، چې د اوبو کمښت، جګړو او نورو ستونزو سره مخامخ دي.
نوموړي وویل، افغانستان یو له هغو هېوادونو دی چې د پرمختګ او ودې لپاره ډېر برابر دی.
ښاغلي عثماني زیاته کړه؛ که نړۍ غواړي فقر کم کړي، ښه ده چې له افغانستان څخه پیل وکړي، ځکه چې اوس افغانستان د نړۍ لپاره یو امن ځای دی، او کرنه، کانونه، صنعت او سوداګري پکې وده کوي؛ نو راشئ په افغانستان کې پانګونه وکړئ، تر څو نه یوازې افغانستان سره، بلکې د نړۍ هغه یو میلیارد خلکو سره چې اوس مهال په فقر کې ژوند کوي، مرسته وشي.
د کرنې او مالدارۍ مرستیال همدارنګه په افغانستان کې د کوکنارو د کر کیلې منع کولو په اړه خبرې وکړې او ويي ویل؛ شاوخوا ۲۰ کاله مخکې افغانستان د نړۍ په کچه د کوکنارو د تولید لوی هېواد و، خو اسلامي امارت د ځانګړي فرمان په صادرولو سره د کوکنارو کر ته د پای ټکی کېښود او اوس بزګرانو حلالو محصولاتو ته مخه کړې ده.
که غواړئ کرنه وده وکړي، راشئ د افغانستان په کرنه کې پانګونه وکړئ او د بدیلي معیشت پروګرامونو له لارې د افغانستان بزګرانو سره مرسته وکړئ، ځکه چې کوکنار نه یوازې افغانستان ته بلکې ټولې نړۍ ته تاوان اړوي.
نوموړي همدارنګه له نړیوالو مرستندویه ادارو وغوښتل، چې د شته امنیت په پام کې نیولو سره افغان بزګرانو ته اړینې مرستې برابرې کړي.
په دې کنفرانس کې د اکسفورډ پوهنتون یوه استاد د افغانستان په وضعیت اندیښنه څرګنده کړه او د بېلابېلو هېوادونو له چارواکو یې وغوښتل چې له افغانستان سره همکاري وکړي.
یاد نړیوال کنفرانس د چین په کوربهتوب ترسره شو، چې پکې د بېلابېلو هېوادونو د کرنې متخصصینو او مسولینو ګډون کړی و.