د احصايې او معلوماتو ملي اداره وایي، د بدخشان ولايت د احصايې او معلوماتو ریاست د ۱۴۰۳ کال په لومړیو شپږو میاشتو کې ۲۱ زره کسانو ته برېښنایي او تر ۲۴ زره زیاتو نورو غوښتونکو ته کاغذي پېژندپاڼې وېشلي دي.
د بدخشان ولايت د احصايې او معلوماتو رییس حافظ حبیبالرحمن عثماني وايي؛ چې د مرکز په ګډون د دې ولايت په ټولو ولسواليو کې د دوی اړوند دفترونه فعال دي او د روان کال په لومړیو شپږو میاشتو کې د يادو دفترونو له لارې توانيدلي، چې درې زره او ۹۰۰ کسانو ته په کاغذي پېژندپاڼو کې د اصلاحاتو راوستو، درې زره او ۷۵۰ کسانو ته د کاغذي پېژندپاڼو د تائید، شپږ زره او ۴۴۲ نورو کسانو ته د ژوند پېښو (شپږ زره او ۳۰۰ زېږون کارتونه او ۱۴۲ د مړینې پارچې) اړوند خدمتونه وړاندې کړي.
د بدخشان ولايت د احصايې او معلوماتو رياست د معلوماتو پر بنسټ په ياد ولايت کې د برېښنایي پېژندپاڼو دوې وېش څانګې فعالې دي، چې نارينه او ښځينه غوښتونکو ته د نویو تذکرو پر وېش سربېره، تر وېش وروسته خدمتونه (د مثنی تذکرې وېش، د زېږونونو، ودونو، طلاق او د کورنۍ د پاتې غړو ثبت) هم وړاندې کوي، چې د روان کال په لومړیو شپږو میاشتو کې ۲۱۲ کسانو ته یاد خدمتونه وړاندې شوي دي.