د کار او ټولنیزو چارو وزیر ملا عبدالمنان عمري د خپل کار په دفتر کې د قطر شاهي هېواد له مستشار ډاکټر مردیف علي القشوتي سره وکتل.
په دې کتنه کې د دواړو هېوادونو ترمنځ د ستراتېژیکو همکاریو پر پیاوړتیا سربېره، قطر هېواد ته د افغان ماهرو کاریګرو د قانوني اعزام په برخه کې د ترسره شویو پرمختګونو او اقداماتو په اړه معلومات شریک او په دې برخه کې د شته هوکړهلیک د غنامندۍ، بشپړ او غوره تطبیق په موخه د ګډو کمیټو پر جوړېدو ټینګار شوی.
د کار او ټولنیزو چارو وزیر پخپلو خبرو کې له افغانستان سره مختلفو برخو کې د قطر شاهي هېواد له مرستو څخه په مننې افغانانو ته د کارموندنې او ټولنیزو خدماتو وړاندې کولو په برخو کې د ګډو پروژو پيلولو لپاره چمتووالی څرګند کړی.
نوموړي زیاته کړې؛ دا چې په افغانستان کې بشپړ امنیت ټینګ او مختلفو ساحو کې د پانګونې لپاره فرصتونه برابر دي، نو غوره به وي، چې قطري پانګوال دلته په پانګونې سربېره خپل هېواد ته د افغاني تازه مېوو د صادرولو هڅه هم وکړي.
ډاکټر مردیف علي القشوتي د کار او ټولنیزو چارو وزیر ته قطر هېواد ته د ورتګ رسمي بلنه ورکړې، ترڅو په نږدې راتلونکي کې یاد هېواد ته رسمي سفر وکړي او د کاریګرو د اعزام په برخه کې د هوکړه لیک د تطبیق په منظور له خپل قطري سیال سره له نږدې وګوري او په اړه یې بحثونه وکړي. د ښاغلي عمري له لوري بلنه منل شوې ده.
د یادونې وړ ده، چې د قطر هېواد سفیر د کار او ټولنیزو چارو وزیر او مل پلاوي ته د هغه هېواد په د ملي ورځې په جشن کې د ګډون بلنه هم ورکړې، چې د ډسمبر په ۱۸ نمانځل کېږي.