سږ کال د میدان وردګ ولایت د اوبو او انرژي ریاست له لوري په میدان وردګ ولایت کې د نږدې ۶۳ میلیونه افغانیو په لګښت د اوبو مهارولو ۱۵ پروژې پلې شوې دي.
د اوبو مهارولو په دغه ۱۵ پروژو کې د اوبو کوچني بندونه، سربندونه، کانالونه، استنادي دېوالونه او د اوبو شبکې شاملې دي؛ چې د میدان وردګ ولایت په مرکز بهسود، لومړۍ حصې بهسود، دایمیرداد، چک، جغتو، نرخ او سید اباد ولسوالیو کې جوړې او ګټې اخیستنې ته سپارل شوې دي.
همدارنګه، په یادو پروژو کې یو خاورین بند هم شامل دی، چې د ولسي خلکو په مالي لګښت جوړ او ګټې اخیستنې ته سپارل شوی دی.
په ورته مهال، یاد ریاست په میدان وردګ ولایت کې د ۳۳ پروژو سروې او ډیزاین ترسره کړی، چې پکې کوچني بندونه، کانالونه او سربندونه شامل دي.
دغه پروژې د اوبو او انرژي وزارت، اف.اي. او موسسې او خیریه بنسټونو په مالي لګښت د میدان وردګ ولایت د اوبو او انرژي ریاست تر څارنې لاندې پلي شوې دي.