د اطلاعاتو او کلتور وزارت د ګرځندوی، مالي او اداري مرستیال مولوي قدرت الله جمال د یوه پلاوي په مشري میدان وردګو ولایت ته سفر کړی.
نوموړي د یاد سفر په ترڅ کې د دې ولایت والي قاري بختيار معاذ او اطلاعاتو او کلتور رییس مولوي حبيب الله مجاهد سره د لا غوره همغږۍ او تورېزم صنعت ته د ودې په اړه خبرې کړي.
په دغه ليدنه کې مولوي قدرت الله جمال اطلاعاتو او کلتور رياست د ولايت په کچه د غوره همغږۍ يو مهم ارګان بللی او ویلي يې دي، سياحت او تورېزم چې د اوسنۍ نړۍ یو له مهمو سوداګریو شمېرل کيږي او ميدان وردګ ولايت د تاريخي جاذبو او سياحتي سيمو له اړخه يو غني ولايت بلل کيږي، بايد دغې برخې ته ځانګړې پاملرنه وشي.
نوموړي زیاته کړې، د افغانستان اسلامي امارت په راتګ سره ډېرو ولايتونو ته د بهرنيو سېلانیانو راتګ ډېر شوی، نو د اطلاعاتو او کلتور رياست له ولايت سره په لا ښه همغږۍ کار وکړي، تر څو دې ولايت ته د سياحينو راتګ ډېر شي او خلکو ته د کار زمينه برابره شي.
په ورته وخت کې میدان وردګو والي قاري بختيار معاذ ویلي؛ اطلاعاتو او کلتور رياست او اړونده رسنۍ له ولايت سره په پوره همغږی کار کوي او تل هڅه کوي تر څو د ميدان وردګو ولايت اړوند لرغونې ابدې او سياحتي سيمي وساتي.
همدارنګه نوموړي، د یاد ولايت د مقام له اړخه له اطلاعاتو او فرهنګ رياست سره د بشپړې همکارۍ ډاډ ورکړی دی.
بل خوا د میدان وردګو د اطلاعاتو او کلتور رییس مولوي حبيب الله مجاهد ویلي، په تېرو دوه کلونو کې مو په یاد ولايت کې ۷۵ لرغونې ابدې او سياحتي سيمې ثبت او راجستر کړې، چې لرغونې استوپې او لويې تاريخي کلاوې پکې شاملې دي.
نوموړي زياته کړې، په دغه ولايت کې یې د مجاهد ملي موزيم تر نامه لاندې موزیم د ولايت مقام په همکارۍ جوړ کړی، چې تر دې مهاله ورته ګڼ شمېر لرغونې او نظامي اثار راټول شوي او د اسلامي امارت د لوړ پوړو چارواکو تر څنګ ګڼ شمېر کورني او بهرني سېلانيان ترې ليدنه کوي.