د اطلاعاتو او کلتور وزارت د ګرځندوی مالي او اداري چارو مرستیال مولوي قدرت الله جمال، د دفتر رییس مولوي احسان الله احسان، د کارکونکو چارو رییس مولوي نقيب الله نعمان او ور سره مل پلاوي ميدان وردګو ولايت ته د سفر پر مهال له مجاهد ملي موزیم څخه ليدنه وکړه.
مولوي قدرت الله جمال د مجاهد ملي موزیم د هېواد په سطحه يو نوښت وباله او د یاد ولایت د اطلاعاتو او کلتور ریاست کړنې یې وستایلې.
دغهراز نوموړي مجاهد ملي موزیم د کلتور، تاريخ جهادي ارزښتونو د ساتنې په برخه کې يو مهم ګام وباله او د ياد موزیم د لاغني کولو لپاره یې د اطلاعاتو او کلتور وزارت له خوا د هر ډول همکاری ژمنه وکړه.
د میدان وردګو ولایت د اطلاعاتو او کلتور رییس مولوي حبيب الله مجاهد راغلي پلاوي ته د ښه راغلاست ترڅنګ د مجاهد ملي موزيم فرهنګي، جهادي او نظامي اثارو لنډه پېژندنه وکړه او وویل، د مجاهد ملي موزیم جوړول یې راتلونکي نسل ته د هېواد د فرهنګي، جهادي او نظامي ارزښتونو ساتل وو.
بل خوا د کارکوونکو چارو رییس مولوي نقيب الله نعمان، مجاهد ملي موزيم هم يوه لويه لاسته راوړنه وبلله او زياته یې کړه، چې د اطلاعاتو او کلتور وزیر د حکم پر بنسټ یې مولوي حبيب الله مجاهد ته ستاینلیک په پام کې نيولې، چې ډېر زر به ورته وسپارل شي.
د يادونې وړ ده، چې پدې وروستيو کې له ياد موزیم څخه د اسلامي امارت د لوړ پوړو چارواکو ترڅنګ د کورنيو او بهرنيو سیلانیانو ليدنه ډېره شوې.