د ریاست الوزرا اداري مرستیال مولوي عبدالسلام حنفي له بهر څخه راستنو شویو یو شمېر شخصیتونو سره لیدنه کړې.
په دې لیدنه کې لومړی هغوی د سراسري امنیت په ټینګښت او د خلکو ستونزو ته په رسېدو کې د اسلامي امارت د مسولینو د هڅو او کوښښونو یادونه کړې او خوښي یې ورباندې څرګنده کړې ده.
دوي ویلي، هېواد کې د رفاه او ټولنیزې هوساینې برابرېدل وطن ته د ډېرو شخصیتونو د راستنېدو لامل شوی او له شک پرته دا د اسلامي امارت له لاسته راوړنو څخه ګڼل کېږي.
همدارنګه یادو شخصیتونو د اسلامي امارت له مسولینو او مشرانو غوښتي، چې د هېواد په بېلابېلو برخو کې د پراختیایي پروژو پلي او هېوادوالو ته د کاري فرصتونو برابرولو ته ځانګړې پاملرنه وکړي.
د ریاست الوزرا اداري مرستیال مولوي عبدالسلام حنفي په دې لیدنه کې د خوښي څرګندولو ترڅنګ ویلي؛ د امنیت ټینګښت، د ټولنیزې هوساینې برابرول او د خلکو ستونزو ته رسېدنه، د اسلامي امارت له مسولیتونو څخه دي او په دې برخه کې خپلې هڅې نه درېغوي.
مولوي عبدالسلام حنفي هغوی ته ډاډ ورکړی او زیاته کړې یې ده، افغانستان د ټولو افغانانو ګډ کور دی.
دغهراز نوموړی د هېواد له ټولو مشرانو او شخصیتونو غوښتي، چې د هېواد په ابادي او پرمختګ کې برخه واخلي او له مسولینو سره همکاري وکړي.