د عامې روغتیا وزارت وایي، چې د افغانستان د عامې روغتیا وزارت په هڅو د سرطان د درملنې لومړنی ۲۰۰ بستریز روغتون به ډېر ژر په کابل کې خپل خدمات پیل کړي.
د عامې روغتیا وزارت د وړاندیز او د اسلامي امارت د مهربانې رهبرۍ له لوري د سرطان ۲۰۰ بستریز روغتون لپاره د ودانۍ د ورکړې او منظورۍ وروسته د یاد روغتون د فعالیدو او خدماتو پیلیدو چارې په تېزۍ سره دوام لري.
د عامې روغتیا وزیر مولوي نور جلال جلالي تېره ورځ (چهارشنبه، د سلواغې ۲۴مه) له دې روغتون څخه د لیدنې پرمهال مسولین هڅولي، چې د خدماتو د ژر پیل لپاره چټک ګامونه واخلي.
مولوي نور جلال جلالي ویلي؛ د سرطان ناروغان زیات ځوریدلي او اړمن خلک دی، د دوۍ لپاره به د عامې روغتیا وزارت ځانګړې پاملرنه تر سره کوي.
نوموړي مسولین هڅولي تر څو هر څه ژر د روغتون د خدماتو د پیلیدو لپاره هڅې تر سره او د هېوادوالو لپاره په دې برخه کې روغتیايي اسانتیاوې را منځته کړي.
د یادونې وړ ده، چې یاد روغتون به په درې مرحلو کې خپل خدمات پیلوي، چې لمړنۍ مرحله یې تر سره شوې او په دوه نورو مرحلو کې د سرطان ناروغانو لپاره د بیلا بیلو عصري تجهیزاتو تر لاسه کول او فعالول دي.
همدارنګه د روغتیايي خدماتو د لا ښه کیفیت په موخه به روغتیايي کارکوونکو ته د ارتقای ظرفیت ځانګړې پروګرام هم برابریږي.