د اطلاعاتو او کلتور وزیر ملا خیرالله خیرخواه پخپل کاري دفتر کې د ناروې هېواد له شارژدافیر البرټ الساس سره لیدنه کړې.
په دې لیدنه کې دواړو لوریو د افغانستان او ناروې تر منځ د اړیکو ترڅنګ په کلتوري مسایلو هم بحث او خبرې کړې دي.
ملا خیرالله خیرخواه افغانستان د زرګونه لرغونی سیمو، تاریخي ځایونه او کلتوري میراثونه ټاټوبی یاد کړی او ویلي یې دي، چې تاریخي ځایونه او کلتوري میراثونه یوازې د افغانستان نه، بلکې د بشریت کلتوري میراثونه دي او اکثره یې ساتنې او ترمیم ته اړتیا لري.
نوموړي زیاته کړې، چې د کلتوري میراثونو ساتنه یوازې د افغانانو دنده نه، بلکې ټوله نړۍ باید د دې میراثونو په ساتنه کې له افغانستان سره همکاري وکړي.
د ناروې شارژدافیر د افغانستان د کلتوري میراثونو د ساتنې په اړه ویلي، چې د اړوند ادارو او موسسو سره به په دې برخه کې همغږي وکړي او د خپل هېواد له لورې یې له افغانستان سره په مختلفو برخو کې د همکاریو پر دوام ټینګار کړی دی.