د عامې روغتیا وزیر مولوي نور جلال جلالي پخپل کاري دفتر کې د افعانستان لپاره د روغتیا نړیوال سازمان له مشر ایډوین سینیزا سلاوډر او مل پلاوي سره د سرطاني ناروغیو د درملنې ۲۰۰ بستریز روغتون د ملاتړ او تجهیز اړوند ناسته وکړه.
په دې ناسته کې د مالي او اداري چارو مرستیال ملا بخت الرحمن شرافت هم ګډون کړی و.
دواړو لوریو د یاد روغتون د خدماتو، تشخیصیه برخې، وسایلو، روغتیايي کارکوونکو د ظرفیت لوړولو او دوامداره ملاتړ اړوند بحث او خبرې کړې دي.
د عامې روغتیا وزیر مولوي نور جلال جلالي مرکز کابل کې د سرطاني ناروغیو د درملنې ۲۰۰ بستریز روغتون تجهیز کول مهم ګام یاد کړی او په یاده برخه کې یې د روغتیا نړیوال سازمان ملاتړ مهم بللی دی.
د روغتیا نړیوال سازمان مشر ایډوین سینیزا سلاوډر په کابل کې د یاد روغتون په جوړېدو خوښي څرګنده کړې او په دې برخه یې د مرستې ډاډ ورکړی دی.