د سلواغې ۲۶مه له افغانستان څخه د سرو لښکرو د وتلو له ۳۶ مې کلیزې سره برابره ده.
د افغانستان اسلامي امارت د یوې اعلامیې په خپرولو سره دغه ورځ د افغانستان په تاریخ کې ویاړلې بللې او ټولو مسلمانانو او مجاهدینو ته یې په دې مناسبت مبارکي ویلې ده.
د سلواغې ۲۶مه (د شوروي اتحاد د سرو لښکرو د شړلو او ماتې ورځ) د افغانستان ملي راډیو تلویزیون کې د هېواد د تاریخي ورځې په مناسبت ونمانځل شوه.
د افغانستان مليراډیو تلویزیون لوی رییس قاري محمد یوسف احمدي په دې تړاو جوړو شویو مراسمو کې د افغانانو قربانۍ ستایلې او ویلي یې دي، چې افغانانو د اشغال پر وړاندې بې شمېره قربانۍ ورکړې او هغه ملت چې قرباني ورکړي د پردیو غوښتنې نه مني.
نوموړی زیاته کړې؛ پخواني شوروي اتحاد د افغانانو په اړه سمه مطالعه نه درلوده او په دې نه پوهېدل، چې افغانان د ازادۍ فکر او روحیه لري.
د اطلاعاتو او کلتور وزیر ملا خیرالله خیرخواه د سلواغې د ۲۶مې په مناسبت په جوړو شویو مراسمو کې ویلي، چې په افغانستان کې له ۴۵ کلونو وروسته یو واحد نظام حاکم دی.
نوموړی زیاته کړې، چې د پردیو مغرضو کړیو تبلیغاتو پر وړاندې هېوادوالو ته د رښتینو معلوماتو ورکول زموږ د ټولو مسولیت دی.
د ښاغلي خیرخواه په وینا؛ اوسمهال افغانستان کې تبعیض او قومپالنه له منځه تللي او هېواد مو ورځ تر بلې د پرمختګ پر لور ګام اخلي.
د اوبو او انرژي وزیر ملا عبداللطیف منصور په یاده غونډه کې ویلي؛ هر هغه څه چې د جهاد پر مهال د اسلامي امارت مجاهدینو لاس ته ورغلي غنیمت او د افغانانو حق دی.
ښاغلي منصور زیاته کړې، چې اشغالګر اړ دي، په افغانستان کې د رامنځته کړیو ویجاړیو بدل کې غرامت ورکړي.
د ښاغلي منصور په وینا؛ اسلامي امارت د عقیدې شریعت او درناوي پر اساس مخکې ځي.
دغهراز د اسلامي امارت مسولین د قدرت ترلاسه کولو له مخې نه دي راټول شوي، چې د موقف او چوکۍ په لټه کې دې وي.
د مالیې وزارت اداري مرستیال مولوي دوست محمد مخلص د پخواني شوروي اتحاد یرغل د افغانانو د دین، کلتور او خپلواکۍ د ختمولو هڅه بللې او ویلي یې، چې پر افغانستان د شوروي اتحاد یرغل یوازې نظامي برید نه و، بلکې د افغانانو د دین، کلتور او خپلواکۍ د ختمولو هڅه وه.
د کابل والي ملا امینالله عبید د اسلامي امارت بیا حاکمیت د افغانانو د یووالي ښکارندوی ګڼلی او ویلي یې دی، چې اوسمهال هېواد کې اسلامي نظام حاکم دی او هېڅ ډول اختلاف پکې شتون نه لري.
د ښاغلي عبید په وینا؛ ځیني مغرضې رسنۍ د افغانستان په تړاو ناسم او له حقیقت څخه لیرې تبلیغات کوي.
د یادونې وړ ده، چې د پخواني شوروي اتحاد د ماتې ورځ د افغانستان په تاریخ کې په زرینو کرښو لیکل شوې. په دې ورځ افغانانو د وخت قدرت مات کړ او پخپلو سرښندنو یې د دوی د کلونو هیلې له خاورو سره خاورې کړې.