د سرحدونو، قومونو او قبایلو چارو وزارت وايي؛ د ننګرهار ولايت د سرحدونو، قومونو او قبايلو چارو رییس رحمت الله غازي عمر په مشري د ياد ولايت په لعل پوره ولسوالۍ کې د دوو کورنيو ترمنځ د ۳۰ کلنې دښمني د حل په موخه يوه لويه غونډه را وبلل شوه، چې پکې ځايي مسولینو، قومي مشرانو، ديني عالمانو او زيات شمير عامو خلکو ګډون در لود.
د دې شخړې د رامنځته کېدو لامل سهوا د يو کس وژل و، چې وروسته په ژورو اختلافاتو بدل شول.
مسولينو د دې موضوع له تحقيق وروسته ښکېل اړخونه سولې ته چمتو او ترمنځ يې د دوه اړخېزې فيصلې په کولو سره هغوی تر منځ د خیر فیصله وکړه.
د غونډې پرمهال وينا والو د خپلو خبرو په ترڅ کې بښنه په اسلامي ټولنه کې د غښتلو خلکو کار ياد کړ او ويې ويل؛ د مسلمانانو ترمنځ غښتلی او پهلوان هغه څوک نه دی، چې بل را وپرځوي بلکې قوي خلک هغه دي، چې يو بل ومني، صبر وکړي او په بښنې کولو سره نورو ته خوشحالي ور په برخه کړي.