د اوبو او انرژي وزارت وايي؛ کندهار ولایت کې د یوه کانال، استنادي دېوال، د اوبو کنټرولي دروازو او اته پلګوټو جوړونې پروژې چارې د څه باندې ۲۹ میلیونه افغانیو په لګښت پیل شوې.
د کندهار ولایت د لوړ میوند ولسوالي په قبات کلي کې د یوه کانال، استنادي دېوال، اته پلګوټو او د اوبو د دوو لویو او وړو کنټرولي دروازو د جوړولو پروژې چارې د ۲۹ میلیونه، ۱۸۲ زره او ۸۱۲ افغانیو په لګښت پيل شوې.
یاد کانال د اووه کیلو متره او استنادي دېوال د ۶۳ متره په اوږدوالي جوړیږي، چې چارې به یې د اته میاشتو په موده کې بشپړې او ګټې اخیستنې ته وسپارل شي.
د یادې پروژې د چارو په بشپړېدو سره به د کانال د ویجاړېدو او د اوبو د ضایع کېدو د مخنیوی ترڅنګ په کرنې کې د سیمې د اوسېدونکو ستونزې هوارې شي.
په دې پروژه کې چې یو شمېر خلکو ته د کار زمینه چمتو شوې، چارې یې د ملګرو ملتونو د خوړو او کرنې سازمان په مالي لګښت د کندهار ولایت د اوبو او انرژي ریاست تر څارنې لاندې پرمخ وړل کېږي.