زرګونه کسانو پرون (شنبه، د وري ۳۰مه) د امریکا په پلازمېنه واشنګټن او په نورو ټولو ښارونو کې د دې هېواد د ولسمشر ډونالډ ټرمپ د سیاستونو پر ضد لاریونونه کړي.
د رویټرز خبري اژانس د راپور لهمخې، معترضینو د کډوالو ایستلو، د دولتي کارکوونکو لیرې کولو او د غزې او اوکراین د جګړو په اړه د ټرمپ له سیاستونو سره مخالفت ښودلی دی.
په ټولنیزو رسنیو کې په خپرو شویو عسکونو کې ښکاري، چې سپینې ماڼۍ ته نږدې لاریونوال “کارکوونکي باید واک ولري”، “د اسرائیلو مسلح کول ودروئ” او نور شعارونه لېږدوي.
ځینې لاریونوالو د هغو کډوالو په ملاتړ شعارونه ورکړي، چې د ټرمپ ادارې ایستل او یا یې هم وباسي. دغهراز د دولتي کارکوونکو ګوښه کولو او هغو پوهنتونونو په ملاتړ هم شعارونه ورکړل شوي، چې د ټرمپ ادارې یې تمویل له ګواښ سره مخ کړی.
د رویټرز د راپور له مخې، یو شمېر لاریونوالو، چې د فلسطین بیرغونه یې لېږدول او فلسطیني برګ څادر یې تر سرونو تاو کړي و، د “ازاد فلسطین” شعارونه ورکړي او په غزه کې یې د اسرائیلو له لوري د شهید شویو فلسطینیانو ملاتړ څرګند کړی. یو شمېر نورو بیا د اوکراین په ملاتړ هم شعارونه ورکړي دي.
ټرمپ او میلیونر ملګري یې ایلان ماسک په جنوري کې حکومت ته له رسېدو وروسته ۲۰۰ زره دولتي کارکوونکي ګوښه کړي او د ګڼو ادارو د له منځه وړلو هڅه یې کړې ده.