د عامې روغتیا وزارت ویاند ډاکټر شرافت زمان امرخیل وایي، چې نن دوشنبه د ثور میاشتې په لومړۍ نېټه په ټول هېواد کې د ګوزڼ ضد واکسین کمپاین پيل شو.
نوموړی زیاتوي، چې د دې کمپاین په ترڅ کې به شاوخوا ۱۱.۶ میلیونه له پینځو کلونو کم عمره ماشومان واکسین شي.
د ښاغلي شرافت په وینا؛ یاد کمپاین به نږدې څلور ورځې دوام وکړي او د هېواد په ۳۴ ولایتونو کې به له پینځه کلونو کمعمره ماشومانو ته وېټامین اې کپسول هم تطبیق شي.
وېټامین اې کپسول د ماشومانو د سترګو لید او دفاعي سیسټم د پیاوړتیا لپاره ګټور دی.
د عامې روغتیا وزارت ویاند له قومي مخورو، علماوو او له هېوادوالو غوښتي، چې د واکسین د ښه تطبیق په موخه دې له واکسیناتورانو سره مرسته وکړي، تر څو په هېواد کې د پولیو د ناروغۍ مخنیوی وشي.