د افغانستان او قزاقستان ترمنځ په کابل کې د افغان-قزاق درې ورځنی ګډ سوداګریز کنفرانس او نندارتون د صنعت او سوداګرۍ د وزير او قزاقستان د لومړي وزير مرستيال او ملي اقتصاد وزير له لوري پرانستيل شو.
د صنعت او سوداګرۍ وزير نورالدين عزيزي وايي، اسلامي امارت هڅه کوي چې له قزاقستان سره د سوداګریزو قراردادونو اندازه زیاته کړي او د دواړو هېوادونو سوداګرو ته د اسانتیاوو په موخه په کابل او الماتا کې سوداګريز مرکزونه جوړ کړي.
نوموړی زیاتوي، چې په تېرو درېیو کلونو کې د افغانستان او قزاقستان ترمنځ د سوداګرۍ کچه ۳۲ سلنه زیاته شوې او دا د دواړه هېوادنو تر منځ د سوادګریزو اړیکو د پياوړتيا ښکارونديي کوي.
له بل لوري د قزاقستان د لومړی وزیر مرستيال وايي، دا نندارتون او سوداګريزه ناسته څرګندوي، چې قزاقي شرکتونه او پانګوال د افغانستان بازارونو ته لېوالتيا لري.
د خصوصي سکټور استازو د افغان-قزاق سوداګرېزه ناسته او نندارتون د دواړو هېوادونو ترمنځ د سوداګرۍ د پياوړتيا او توليداتو لپاره د بازارموندنې ښه فرصت ياد کړی دی.
تېر کال هم د قزاقسنان مرکز الماتا کې د افغان-قزاق درې ورځنی نندارتون جوړ شوی و، چې د دواړو هېوادونو ترمنځ د ۲۰۰ ميليونه ډالرو په ارزښت تړونونه پکې لاسليک شوي وو.