د هند تر واک لاندې جمو او کشمیر ایالت په پهلګام کې پر سیلانیانو وسلهوال برید شوی، چې ۲۶ کسان پکې وژل شوي.
په دې برید کې ۳۶ نور کسان ټپيان شوي هم دي، چې د ډېرو یې روغتیايي وضعیت نازک ښودل شوی.
ویل کېږي، چې سیمه کلابنده ده او د پېښې ځای ته روغتیايي ډلې رسېدلې دي.
تر اوسه کومې ډلې د دې برید مسولیت نه دی منلی. په یاد برید ګڼو بنسټونو ژوره خواشیني څرګنده کړې.
کشمېر د هند او پاکستان ترمنځ لانجمنه سیمه ده، چې یوه برخه یې د هند تر واک لاندې ده.
د هند تر واک لاندې کشمیر کې پهلګام د سيلانيانو لپاره يوه مشهوره سیمه بلل کېږي. د رسمي شمېرو له مخې په ۲۰۲۴ کې ۳.۵ میلیونه سیلانیانو له کشمیر څخه لیدنه کړې ده.