د سوداګرۍ او پانګونې خونه وايي، د غويي په اتمه به د ایران ۲۰۲۵ اکسپو نندارتون کې یو شمېر افغان سوداګر او پانګوال ګډون وکړي.
دغه نندارتون کې به افغان سوداګر او پانګوال په ۸۰ غرفو کې افغاني کرنیز محصولات او لاسي صنایع نندارې ته کېښودل شي.
د ایران دولتي رسنیو له قوله، د افغانستان لپاره د دغه هېواد د سوداګرۍ سلاکار حسین روستايي، د افغانستان او ایران ترمنځ د فعالې اقتصادي او سوداګریزې ډیپلوماسۍ او ایران کې د ۲۰۲۵ اکسپور نندارتون ته په اشارې ویلي، یاد نندارتون کې افغان سوداګرو او پانګوالو ته هم بلنه ورکړل شوې.
د ایران او افغانستان ترمنځ د اقتصادي همکاریو د پراختیا او سوداګریزو اړیکو د پیاوړتیا لپاره، د افغانستان د کرنې، اوبو لګولو او مالدارۍ وزارت د مرستیال په مشرۍ یو پلاوی، د کرنې او مالدارۍ د تولید خونې او د افغانستان د سوداګرۍ او پانګونې خونې استازي، چې ۲۲۰ افغان سوداګر او پانګوال پکې شامل دي، د اکسپو ۲۰۲۵ نندارتون کې ګډون وکړي.
یو شمېر اقتصادي کارپوهان په نړیوالو نندارتونونو کې د افغانستان حضور، په ځانګړې توګه د ایران په اکسپو ۲۰۲۵ کې، د هېواد د محصولاتو د بازار موندنې په لور یو مهم ګام ګڼي.
دوی وايي، چې دا نندارتونونه، د افغانی محصولاتو د معرفي کولو سربیره کولی شي د اقتصادي همکاریو پراخولو ته هم لاره هواره کړي
د ایران د اکسپو ۲۰۲۵ نندارتون به د یوې اونۍ لپاره په تهران کې ترسره شي، چې له ۹۴ څخه زیاتو هېوادونو پانګوال او سوداګر به پکې ګډون وکړي.