په افغانستان کې د ملګرو ملتونو پراختیايي پروګرام (UNDP) ویلي، چې په ۲۰۲۴ کال کې یې د ۱۰۰ کیلومټرو په اوږدوالي د افغانستان په کلیو کې شاوخوا ۴۵ کانالونه جوړ کړي دي.
یاد سازمان په یوه خبرپاڼه کې ویلي، چې دغو کانالونو د څښاک پاکو اوبو ته د ۳۷ زره کورنیو د لاسرسي زمینه برابره کړې ده.
په ورته مهال د کرنې اوبو لګولو او مالدارۍ وزارت وايي، دغه کانالونه په شپږو ولایتونو کې د کښتونو خړوبولو په موخه جوړ شوي دي.
یو شمیر بزګران د دغه کانالونو د جوړیدو هرکلی کوي وايي، په دې سره توانیدلي چې خپلو کښتونو ته پر وخت اوبه ورسوي.
د کرنې اوبو لګولو او مالدارۍ وزارت وايي؛ هڅه کوي چې د نړیوالو مرستندویه بنسټونو په همکارۍ د هېواد په ټولو ولایتونو کې ګروندګرو او بڼوالو ته امکانات په واک کې ورکړي، څو ښه حاصلات تر لاسه کړي.