د المپیک، بدني روزنې او ورزش عمومي رییس مولوي احمد الله وثیق د ترکیې هېواد له سفیر جنک رونال سره په خپل کاري دفتر کې لیدنه کړې.
د دې لیدنې پر مهال د ورزش ادارې فني او مسلکي مرستیال حافظ احمد جان ځدراڼ او د ورزش ادارې د رهبرۍ یو شمېر نورو غړو هم شتون درلود.
مولوي احمد الله وثیق د ترکیې هېواد سفیر ته د ښه راغلاست ویلو ترڅنګ د افغانستان په مختلفو برخو کې د یاد هېواد همکارۍ ستایلي دي.
ښاغلي وثیق هیله څرګنده کړې، چې افغانستان او ترکیه به وکولی شي په راتلونکې کې د ورزش په برخه کې ښې همکارۍ او اړیکې ولري.
د ترکیې سفیر د افغانستان په مختلفو برخو کې د خپلو همکاریو، په ځانګړي ډول د تعلیم او افغان کډوالو په برخې کې یادونه کړې.
جنک رونال هیله څرګنده کړې، چې د افغانستان او ترکیې ترمنځ په راتلونکې کې د ورزش په برخه کې هم همکارۍ پراخې شي.
نوموړي ژمنه کړې، چې په دې برخه کې به عملي کار پیل کړي.
د غونډې په وروستیو کې د ورزش ادارې او فوټبال فدراسیون د فني او مسلکي مرستیال له خوا د افغانستان د فوټبال پر جوړښت او وروستیو لاسته راوړنو بشپړ معلومات وړاندې شوي دي.