بسم اللٰه الرحمن الرحیم
په دوحه کې د حماس اسلامي غورځنګ په دفتر د صهیونیستي رژیم لخوا برید شوی، چې له امله یې د حماس څو تنه غړي شهیدان شوي دي.
انالله و انا الیه راجعون
د شهیدانو کورنیو، فلسطیني مجاهدینو ته د تسلیت مراتب وړاندې کوو، شهیدانو ته د جنت الفردوس او کورنیو ته یې د جمیل صبر دعاکوو.
په قطر هېواد تجاوز او بیا د حماس اسلامي غورځنګ سیاسي دفتر په نښه کول په کلکو ټکو غندو او دا د ټولو انساني موازینو خلاف وحشیانه عمل بولوو.
صهیونیست رژیم په مکرر ډول او خورا په بې باکۍ سره د انساني او سیاسي متعارفو نورمونو نقض کوي او پرلپسې جنایات ترسره کوي، خو په وړاندې یې موثر هېوادونه او نړیوال سازمانونه چوپ دي چې دا خورا د تأسف خبره ده.
موږ غوښتنه کوو چې هرڅه ژر باید د اسرائیلو د تجاوزاتو او روانو وحشتونو مخه ونیول شي، د هېوادونو د حریمونو درناوی وشي او په فلسطین کې په مظلومو مسلمانانو روان ناورین، وحشت او ظلم پای ته ورسیږي.
له الله تعالی جل جلاله څخه خواست کوو چې د صهیونیستانو د ظلمونو له امله هغوی ته سخته سزا ورکړي او په سخت شکست سره یې محکوم کړي ترڅو په ټوله نړۍ کې د متجاوزینو لپاره ستر عبرت او درس وګرځي، امین یا رب العٰلمین
د افغانستان اسلامي امارت