افغان فوټبال ملي لوبډلې د ۲۰۲۶ نړیوال جام او ۲۰۲۷ اسیا ملتونو جام سیالیو ته د لار موندنې په دویم پړاو سیالیو کې ۱/۲ هندوستان ملي لوبډلې ته ماتې ورکړه.
دا لوبه د هندوستان په کوربتوب په ګواهټي ښار کې ترسره شوه، چې د افغانستان لپاره پکې رحمت اکبري او شریف محمد یو-یو ګول ترسره کړل.
د یادې لوبې په لومړۍ نیمايي کې هندوستاني لوبډلې یو ګول وکړ او په دویمه نیمايي کې افغانستان د دوو ګلونو په کولو سره سیالي پر خپل نوم کړه.
د هند او افغانستان تر منځ تېره لوبه، چې د عربستان په ابها لوبغالي کې ترسره شوې وه، مساوي پای ته ورسېده.
افغان فوټبال ملي لوبډله، چې د کویټ، قطر او هند سره په ګروپ کې ده، ۴ امتیازونه لري.
په دې ګروپ کې قطر تر دې مهاله درې لوبې ګټلې او لومړی مقام لري، هند بیا په دویم مقام سره دوې لوبې بایللې، یوه یې ګټلې او یوه بله یې مساوي کړې ده. افغانستان درېیم مقام لري، چې دوې لوبې یې بایللې، یوه یې مساوي کړې او یوه یې ګټلې ده. او کویټ بیا یوه ګټلې او دوې یې بایللې دي.
د یادونې وړ ده، چې افغانستان له قطر او کویټ سره د بېرته راتګ یوه-یوه لوبه لري.