یحی سنوار د حماس اسلامي مقاومت غورځنګ له مشرانو څخه یو و.

نوموړی د ۱۹۶۲ د اکتوبر په ۲۹مه د غزې خان یونس د کډوالو په کمپ کې وزېږېد. لوړې زده کړې یې د غزې په پوهنتون کې بشپړې کړې، په عربي ژبه کې یې دوکتورا درلوده او په انګلیسي او عبراني ژبو مسلط و.

یحیی سنوار د اسرائیلو پر وړاندې د حماس غورځنګ د بنسټ اېښودونکي شیخ احمد یاسین د پرله‌پسې هڅو په پایله کې له یاد اسلامي مقاومت سره یو ځای شوی و.

نوموړی د لومړي ځل لپاره په ۱۹۸۲ کال د صهیونیستي رژیم له لوري ونیول شو.

څلور ځله د اسرائیلي رژیم له لوري په ابدي حبس محکوم شو، ۲۲ کاله یې په زندان کې تېر کړل، چې څلور یې تر نورو هغو سخت او په یوازيتوب کې وو.

نوموړي‌ او ملګرو یې د تېر کال د اکتوبر پر اوومه د بریدونو په یوه ډېره دقیقه پلان شوې لړۍ کې اسرائیلو ته د خپل تاریخ تر ټولو بده ماته ورکړه.

یحیی ابراهیم سنوار ویلي: “که چېرې ټوله نړۍ لاس په کار نه شي، په سیمه کې به لویه مذهبي جګړه رامنځته شي او د منځني ختیځ دغه کړکیچ به ټوله نړۍ وګواښي.”

د ۲۰۲۱ کال په مې میاشت کې اسرائیلو د یحیی سنوار کور او دفتر په یوه برید کې ویجاړ کړل.

نوموړي په ۲۰۲۲ کې په یوه مرکه کې له خلکو وغوښتل، چې له هرې ممکنې لارې د اسرائيلو پر وړاندې د خپلې خاورې په ننګه ودرېږي.

ښاغلی سنوار د اسماعیل هنیه له شهادت وروسته د حماس د سیاسي دفتر مشر وټاکل شو.

نوموړی له اوږدې مبارزې وروسته د روان زېږدیز کال د اکتوبر میاشتې پر ۱۶مه د غزې په سویلي رفح ښار کې له اسرائیلي عسکرو سره په نښته کې ښکېل او په شهادت ورسېد.

د الجزیرې خبري شبکې د راپور له مخې پرون (جمعه، د تلې ۲۷مه) اسرائیلو یرغلګرو د غزې په شمال کې پر جبالیا پنډغالي هوایي برید کړی، چې د ۲۱ مېرمنو په ګډون ۳۳ فلسسطینیان پکې شهیدان او لسګونه نور ټپیان شوي دي.

ویل کېږي، چې یو شمېر کسان لا هم تر ویجاړیو لاندې پاتې دي او ښايي چې د شهیدانو شمېر نور هم لوړ شي.

د غزې شمال کې د العوده روغتون سرپرست ډاکټر خالد محمد صالح الجزیرې ته ویلي؛ روغتون ته یې د پېښې له ځایه ګڼ ټپیان ور وړل شوي، چې د امکاناتو د کمښت له امله یې درملنه او ورته رسېدنه ستونزمنه ده.

د یادونې وړ ده، چې پر جبالیا پنډغالي د هوایي برید د شهیدانو په شمول پرون غزه تړانګه کې د صهیونیستي یرغګرو د بریدونو له کبله لږ تر لږه ۶۴ فلسطینیان شهیدان او ګڼ نور ټپيان شوي دي.

جبالیا کمپ کې شاوخوا ۴۰۰ زره خلک ایسار پاتې دي او تر دوو اونیو ډېر وخت کېږي، چې د اسرائیلي یرغلګرو له لوري کلابند دي او ډېر کم خواړه او اوبه ور رسېږي.

د یادونې وړ ده، چې پر غزه د صهیونیستي یرغلګرو د بریدونو له پیل راهیسې ۴۲ زره او ۵۰۰ فلسطینیان شهیدان او ۹۹ زره او ۵۴۶ نور ټپيان شوي دي.

د کډوالو ستونزو ته د رسېدنې عالي کمېسیون دارالانشاء

د کمېټو ورځنی کاري راپور

د جمعې مبارکه ورځ، د ۱۴۴۶/۴/۱۵ هـ ق نېټه چې ۱۴۰۳/۷/۲۷ هـ ل نېټې سره سمون خوري، د هېواد له بېلابېلو لارو څخه افغان کډوال راستانه شوي او په بېلابېلو برخو کې ورته اړین خدمات وړاندې شوي چې بشپړ راپور یې په لاندې ډول وړاندې کیږي:

ننـــــــــګرهــــــار

تورخم (ډیورنډ فرضي کرښه)

د ثبت، تثبیت او استقبال کمېټه:

د تورخم له لارې (۱۶) کورنۍ هېواد ته راستنې او د نوموړو کورنیو (۹۶) تنه غړي، ثبت او بایمیټریک شوي دي.

د ټرانسپورټ او لېږد کمېټه:

له تورخم څخه (۸) کورنۍ چې د غړو شمېر یې (۹۲) تنه و، کابل او ننگرهار ولایتونو ته په خوندي توګه لېږدول شوې دي او یادو کورنیو ته (۴۹۵۰۰)افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له (۱۵) کورنیو سره مجموعًا (۱۲۸۰۰۰) افغانۍ کیږي.

د خدماتو او روغتیايي چارو کمېټه:

د تورخم په عمري کمپ کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په تورخم کې (۱۸۰) خوراکه ډوډۍ او اوبه ویشل شوي دي.

روغتیا: په تورخم کې (۱۲۳) تنه راستانه شوي مهاجرین تداوي شوي دي.

مخابرات: راستنو شویو مهاجرینو ته (۴۱) عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، توزیع شوي دي.

په تورخم کې مهاجرینو ته ځینې البسه لکه توشکې بړستنې او داسې نور شیان هم توزیع شوې دي.

کنــــــــــــــدهار

سپین بولدک (ډیورنډ فرضي کرښه)

د ثبت، تثبیت او استقبال کمېټه:

د سپین بولدک له لارې (۳۶) کورنۍ چې د غړو شمېر یې (۱۹۴) تنه و، هېواد ته راستنې او ثبت شوي دي.

د ټرانسپورټ او لېږد کمېټه:

له سپین بولدک څخه (۷) کورنۍ چې د غړو شمېر یې (۴۱) تنه و، کندهار، هرات زابل او کابل ولایتونو ته په خوندي توګه لېږدول شوې دي او یادو کورنیو ته (۲۴۰۰۰) افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري له (۳۶) کورنیو سره مجموعًا (۲۹۶۰۰۰) افغانۍ کیږي.

د خدماتو او روغتیايي چارو کمېټه:

په سپین بولدک کې راستنېدونکو مهاجرینو ته د روغتیا په شمول لاندې بېلابېل خدمات وړاندې شوي:

غذا: په سپین بولدک کې (۳۵۹) خوراکه ډوډۍ او اوبه ویشل شوي دي.

روغتیا: په سپین بولدک کې (۷۹) تنه راستانه شوي مهاجرین تداوي شوي دي.

همدارنګه (۲۸۷) تنه مهاجرینو ته د روغتیا په بېلا بېلو برخو کې عامه پوهاوی ورکړل شوی دی.

البسه: په لنډ مهاله کمپونو کې د اړتیا سره سم خیمې، کمپلې او توسان مهاجرینو ته وېشل شوي دي.

نیمروز

ورېښمو لار

د تثبیت، ثبت او استقبال کمېټه:

د نیمروز ولایت د ورېښمو له لارې (۶۷) کورنۍ چې د غړو شمېر یې (۲۷۳) تنه و، هېواد ته راستنې او ثبت شوي دي او همدا راز (۱۲۸۹) مسافر هېواد ته راستانه شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۵۵) کورنیو سره مجموعًا (۴۰۴۰۰۰) افغانۍ مرسته شوې ده.

د خدماتو او روغتیايي چارو کمېټه:

د نیمروز د ورېښمو په لار کې راستنه شویو مهاجرینو ته د روغتیا په شمول لاندې بیلابیل خدمات وړاندې شول:

مخابرات: د مخابراتو او معلوماتي ټکنالوژۍ د مسئولینو له لوري (۶۷) عدده سیم کارتونه مهاجرینو ته په وړیا توګه چې وړیا دقیقې او د انټرنټي بستې هم پکې فعاله وې، توزیع شوي دي.

د اطلاعاتو او عامه پوهاوي کمېټه:

د نیمروز ولایت د ورېښمو په لار کې مهاجرینو ته عامه پوهاوی ورکړل شو. یادو مهاجرینو ته د دوی د ثبت، لیږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شو.

هرات

اسلام کلا

د تثبیت، ثبت او استقبال کمېټه:

د اسلام کلا له لارې (۹۸) کورنۍ چې د غړو شمېر یې (۳۷۳) تنه و، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري له (۹۳) کورنیو سره مجموعًا (۶۷۸۰۰۰) افغانۍ مرسته شوې ده.

کابل

مرکز

د ټراسپورټ او لیږد کمېټه:

له کابل څخه (۲۲) کورنۍ چې د غړو شمېر یې (۱۰۲) تنه و، کندز، بغلان، بلخ، تخار، لغمان او هرات ولایتونو ته په خوندي توګه لېږدول شوې دي او یادو کورنیو ته (۷۶۰۰۰) افغانۍ کرایه هم ورکړل شوې ده.

د ټولو کمېټو د بېلا بېلو کړنو ټولیز ارقام په لاندې توګه دي:

ثبت شوي مهاجرین: (۲۱۷) کورنۍ او (۹۳۶) افراد

لېږدول شوي مهاجرین: (۳۷) کورنۍ او (۲۳۵) افراد

مرسته شوي مهاجرین: (۱۹۹) کورنۍ

وېشل شوي سیمکارتونه: (۱۰۸) عدده

د کډوالو ستونزو ته د رسېدنې عالي کمېسیون دارالانشاء

د افغانستان اسلامي امارت د ریاست الوزرا اداري مرستیال مولوي عبدالسلام حنفي د پکتیکا له مرستیال والي مولوي مخدوم عبدالسلام سعادت سره لیدنه کړې.

په پیل کې د پکتیکا مرستیال والي د یاد ولایت د اجتماعي، امنیتي او اقتصادي وضعیت ترڅنګ د دې ولایت د سیمه‌ییزو ادارو د کړنو او فعالیتونو په اړه د ریاست الوزرا اداري معاونیت مقام ته راپور وړاندې کړی.

نوموړي ویلي، چې په پکتیکا کې سیمه‌ییز مسولین او مجاهدین په خپل ټول توان خلکو ته د خدمت، امنیت د ټینګښت او دوی ته د هوسا ژوند برابرولو په برخو کې هر اړخیزې نه ستړې کېدونکې هلې ځلې کوي.

مولوي مخدوم عبدالسلام سعادت همداراز په پکتیکا ولایت کې د ښوونې او روزنې، روغتیا، مواصلاتي لارو او انکشافی پروژو عملي کولو ته اشاره کړې او د اسلامي امارت له مسولینو یې غوښتي، چې یادو برخو ته ځانګړې پاملرنه وکړي.

مولوي عبدالسلام حنفي د پکتیکا مرستیال والي سره پر کتنې خوښي څرګنده کړې او ویلي یې دي، چې د امنیت تأمین، ولسونو ته د خدماتو وړاندې کول او دوی ته په بېلابېلو برخو کې د پرمختګ او هوساینې برابرول د اسلامي امارت له دندو څخه دي او مسولین په دې برخه کې خپلې هیڅ راز هڅې نه درېغوي.

نوموړي د پکتیکا مرستیال والي له لوري د مطرح شویو موضوعاتو په اړه څرګنده کړې، چې اسلامي امارت به خپلو شته امکاناتو ته په پام یادو برخو ته رسیدنه وکړي.

د افغانستان اسلامي امارت د ریاست الوزرا اداري مرستیال مولوي عبدالسلام حنفي د سرپل ولایت له یو شمېر علماوو او سیمه‌ییزو مسولینو سره لیدنه کړې.

په پیل کې راغلو علماوو او سیمه‌ییزو مسولینو د سرپل ولایت د اجتماعي، امنیتي او اداري وضعیت په اړه د ریاست الوزرا اداري معاونیت مقام ته معلومات ورکړي.

دوی ویلي، چې په یاد ولایت کې سیمه‌ییز مسولین خپله ټوله هڅه کوي، تر څو په بېلابېلو برخو کې ولسونو ته خدمات وړاندې او ولسونه په ډاډه زړه خپلو ورځنیو چارو ته رسیدنه وکړي.

یادو علماوو او سیمه‌ییزو مسولینو په دې ولایت کې د ښوونې او روزنې او انکشافي چارو موضوعاتو ته اشاره کړې او د اسلامي امارت له مسولینو یې غوښتي، چې یادو برخو ته ځانګړې پاملرنه وکړي.

د ریاست الوزرا اداري مرستیال مولوي عبدالسلام حنفي راغلو علماوو ته د ښه راغلاست ترڅنګ ویلي، چې مسولین د دوی د نظریاتو او وړاندیزونو اورېدو د هرکلي ترڅنګ هڅه کوي، چې خپلو امکاناتو ته په پام د مراجعینو نظریاتو او وړاندیزونو ته لازمه رسیدنه وکړي.

د فلسطین د اسلامي غورځنګ (حماس) د سیاسي مشر یحیی السنوار د شهادت په اړه د افغانستان اسلامي امارت د ریاست الوزرا د تعزيت پیغام!

حامدا و مصلیا امابعد:
قال الله تعالی:
اعوذ بالله من الشیطن الرجیم
بسم الله الرحمن الرحیم
مِّنَ الْمُؤْمِنِينَ رِجَالٌ صَدَقُوا مَا عٰهَدُوا اللَّهَ عَلَيْهِ ۖ فَمِنْهُم مَّن قَضٰى نَحْبَهُۥ وَمِنْهُم مَّن يَنتَظِرُ ۖ وَمَا بَدَّلُوا تَبْدِيلًا
سُوۡرَةُ الاٴحزَاب : ۲۳
په خواشینۍ سره مو خبر تر لاسه کړ، چې د حماس اسلامي غورځنګ مشر یحیی ابراهیم حسن السنوار د اسرائیلي صهیونیستي اشغالګرو په یوه حمله کې په شهادت رسیدلی.
إنالله و إنا إليه راجعون
د الله تعالی په لاره کې شهادت د هر مسلمان بیا په تېره د جنګیدونکي مجاهد ستر ارمان وي، موږ د اتل مجاهد ورور، یحیی سنوار د شهادت له امله د حماس اسلامي تنظیم، ټولو مجاهدینو او خصوصا د فلسطین مظلوم او مجاهدو خلکو ته تسلیت وایو.
الله تعالی دې د مرحوم سنوار شهادت قبول کړي، کورنۍ، ټولو دوستانو او متعلقینو ته دې یې جمیل صبر او جزیل اجر ورکړي.
اسرائیلي اشغالګر باید هیره نه کړي، چې د مجاهدو مشرانو شهادتونه به لا هم د دښمن په وړاندې جهادي مبارزه تونده او څو برابره تقویه کړي ان شاءالله تعالی.
موږ د نړۍ له ټولو مسلمانانو څخه غواړو، چې د فلسطین د مظلومو خلکو له داعیې څخه ملاتړ وکړي، د هغوی تر شا ودریږي او دغه مشترک الهي مکلفیت چې ټولوته راجع دی اداکړي.
اللهم أجرنا فی مصیبتنا واخلف لنا خيرًا منها

د الجزیرې خبري شبکې د راپورونو له مخې، حماس غورځنګ یوه لوړپوړي چارواکي خلیل الحیه د جمعې له لمانځه وروسته ویلي، چې د یحیی السنوار او د دغه غورځنګ د نورو پخوانیو مشرانو شهادت حماس لا پیاوړی کوي.

ښاغلي الحیه ټینګار کړی چې تر هغه وخته پورې چې د صهیونیستي رژیم ځواکونه له غزې نه وي ووتلي او د دغې تړانګې کلابندي پای ته نه وي رسېدلې، اسراییلي اسیران به خپلو کورونو ته نه ګرځي.

د یادولو وړ ده چې څو موده وړاندې، د حماس د سیاسي دفتر پخوانی مشر ډاکټر اسماعیل هنیه په ایران کې د صهیونیستي رژیم په هدفي برید کې شهید شو.

د صنعت او سوداګرۍ وزارت وایي، نورالدین عزیزی ده دې وزارت وزیر په مشرۍ د خصوصي سکتور او امارتی چارواکو یوه ګډ پلاوي د قزاقستان الماتای ښار ته سفر وکړ.

د یاد وزارت په وینا، چې دغه پلاوې به د افغانستان د کورنیو تولیداتو نندارتون کې د ګډون ترڅنګ د یاد هېواد له چارواکو او سوداګرو سره کتنې وهم ولري.

دغه وزارت زیاته کړې، چې په دې سفر کې د کانونو او پټرولیم وزارت د مرستیال، د بهرنیو چارو وزارت د پانګونې د اسانتیا د رییس، د بهرنیو چارو وزارت د استازو، د اقتصاد مرستیال، د مرکزي بانک د رئیس او غړو په ګډون څه باندې ۲۵۰ کسان برخه لري. په دغه پلاوي کې د هېواد خصوصي سکټور ملګرتيا کوي.

ټاکل شوې د افغانستان د کورنیو تولیداتو نندارتون د ۲۵۰ افغان سوداګرو په ګډون د روانې میلادي میاشتې په ۲۰مه پیل شي.