د عامې روغتیا وزیر مولوي نور جلال جلالي په خپل کاري دفتر کې د یونیسف ادارې او خوړو نړیوال سازمان له استازو سره لیدنه کړې.

په دې لیدنه کې په افغانستان کې د ماشومانو له کورنیو سره د نغدي مرستو د وېش پروګرام پر څرنګوالي خبرې شوې.

مولوي نور جلال جلالي ویلي؛ د عامې روغتیا وزارت ژمن دی چې د هغه پروګرامونو د پلي کېدو ملاتړ وکړي، چې په مستقیم او غیر مستقیم ډول د روغتیايي وضیعت په ښه والي کې مرسته کوي.

نوموړي همداراز ټینګار کړی، چې د دغه پروګرام د پلي کېدو چارې دې د روغتیا وزارت او پلي کوونکو بنسټونو ترمنځ د دوه اړخیزه همغږۍ او هوکړه لیک له لاسلیک کېدو وروسته پیل شي.

 بل لور د یونیسف او خوړو نړیوال سازمان استازو په دې برخه کې د عامې روغتیا وزارت د همکارۍ څخه د مننې سربېره ټینګار کړی، چې د یاد پروګرام د پلي کېدو چارې به د روغتیا وزارت سره د هوکړه لیک له لاسلیک وروسته د یو ځانګړي میکانیزم له مخې په ړون ډول د پلي کوونکو بنسټونو سره په همغږۍ ترسره شي.

له پېښو سره د مبارزې تیاري ملي ادارې رییس ملا نورالدین ترابي او د ډنمارک د کډوالۍ نړیوالې موسسې مرستیال احمد ضیا مایار ترمنځ د ګډو همکاریو هوکړه لیک لاسلیک شو.

له پېښو سره د مبارزې تیاري ملي ادارې رییس ویلي، ټولې موسسې او امارتي ادارې دې د طبیعي او غیرطبیعي پېښو خطرونو کمولو په برخه کې ګډه همکاري وکړي.

نوموړي زیاته کړې، ټولې ادارې دې خپلو مرستو ته دوام ورکړي ترڅو په افغانستان کې د بېوزلۍ کچه را ټیټه شي.

د ډنمارک د کډوالۍ نړیوالې موسسې مرستیال احمد ضیا مایار ویلي؛ دغه سازمان شاوخوا ۲۵ کاله کېږي، چې په افغانستان او نورو هېوادونو کې له کډوالو سره کار کوي او په طبیعي او غیری طبیعي پېښو، په جګړه ځپلو سیمو، ماین پاکي او په بېړنیو شرایطو کې افغانانو ته مرستې رسوي.

نوموړي همدا راز له پېښو سره د مبارزې تیاري ملي ادارې له کړنو خوښۍ څرګنده کړې او ویلي يي دي، یادې ادارې په وخت سره زموږ کارونه ترسره کړي او زموږ یې ملاتړ کړی.

په پای کې دواړو خواوو د ماینونو او ناچاده توکو ککړو سیمو پاکولو، نغدي مرستو، د رواني درملنې خدماتو وړاندې کولو، د ماینونو او ناچاوده توکو له امله قربان شوو ملاتړ او د ماین پاکي موسسو د تخنیکي برخې کارکونکو د ظرفیت لوړولو په برخه کې د ۴۷۱ زره او ۸۸ امریکایي ډالرو په ارزښت هوکړه لیک لاسلیک کړ.

یاده پروژه به د کابل ولایت په شپږمه ناحیه، مسلم کلي او سروبي ولسوالۍ کې پلي شي.

د ریاست الوزرا سیاسي مرستیال مولوي عبدالکبیر د لومړي مس عینک قراردادي کمپنۍ له ریيس سونګ ون بینګ او مل پلاوي سره لیدنه کړې.

په دې لیدنه کې سونګ ون بینګ ویلي، د مس عینک عملي چارو د ژر پیل په موخه یې هڅې چټکې کړې دي او د اسلامي امارت په راتګ سره د کان کېندنې د ډېرو ستونزو د حل ترڅنګ لاهم د افغانستان د حکومت همکاریو ته اړتیا لري.

نوموړي زیاته کړې، د مس عینک په لومړۍ برخه کې به له پینځه میلیارده ډالرو ډېره پانګونه وکړي او همدارنګه به دغې سیمې ته د غزیدلي سړک له جوړېدو وروسته د کان کېدنې لومړنۍ چارې پیل او په راتلونکي زېږدېز کال به د اړتیا وړ ماشینري هم افغانستان ته راوارد کړي.

سونګ ون بینګ ویلي؛ په دغه پروژه کې به په مستقیم ډول درې زرو افغانانو ته د کار زمینه برابره شي او پلان لري، چې یوه ډله افغانان له ګمارنې وروسته د مسلکي روزنې په موخه چین ته ولیږي.

دغه‌راز نوموړي تاریخي سیمي او د کان کېدنې پلان بدلون د دغې پروژې د ځنډ سببونه یاد کړي دي.

وروسته د ریاست الوزرا سیاسي مرستیال مولوي عبدالکبیر د لومړي مس عینک قراردادي کمپنۍ رییس او مل پلاوي ته د ښه راغلاست تر څنګ، په بېلابېلو برخو کې د چین او افغانستان اړیکې ګټورې بللي او ویلي یې دي، اسلامي امارت د مس عینک له قراردادي کمپنۍ سره د عملي کار پيل لپاره همکارۍ ته چمتو دی.

مولوي عبدالکبیر زياته کړې، د مس عینک د عملي چارو پیل ته دې هڅې ډېرې او د وخت له ضایع کېدو باید مخنیوی وشي.

دغه‌راز د لیدنې په پای کې مولوي عبدالکبیر د لومړي مس عینک قراردادي کمپنۍ ته ډاډ ورکړی، چې اړونده ادارې به د هغوی د ستونزو د حل په موخه لاس په کار شي.

د ریاست الوزرا اداري مرستیال مولوي عبدالسلام حنفي د فاریاب ولایت بلچراغ ولسوالۍ له یو شمېر علماوو سره لیدنه کړې.

د دې لیدنې په پیل کې یادو علماوو په هېواد کې د امنیت او سرتاسري ثبات پر ټینګښت خوښي څرګنده کړې.

دوی ویلي، سیمه ییز مجاهدین او مسولین هېوادوالو ته د خدمت او د دوی د ستونزو د حل په برخه کې تل هڅې کوي.

نوموړو دې ته په اشارې چې وروستیو سېلابونو په دې ولسوالۍ کې زیات ویجاړۍ رامنځته کړې او د سیمې خلکو ته یې ګڼ شمېر زیانونه اړولي، د اسلامي امارت له مسولینو غوښتي، چې له زیانمنو سره د مرستو ترڅنګ دې په یاده ولسوالۍ کې د پراختیایي پروژو عملي کولو ته ځانګړې پاملرنه وکړي.

وروسته د ریاست الوزرا اداري مرستیال مولوي عبدالسلام حنفي پر یادې کتنې خوښي څرګنده کړې او ویلي یې دي؛ د امنیت ټینګښت، ولسونو ته د ټولنیزې هوساینې برابرول او د دوی د ستونزو حلول د اسلامي امارت دنده ده او په دې برخه کې له خپلو ټولو شته امکاناتو استفاده کوي.

مولوي عبدالسلام حنفي د اسلامي امارت د پراختیایې پروژو په اړه خبرې کړي او د دوی وړاندیزونو ته په اشارې یې ویلي، اسلامي امارت به د خپل توان په محدوده کې ورته رسېدنه وکړي.

د ریاست الوزرا دفتر لوی رییس ډاکټر ملا عبدالواسع نن ماسپښین د کانونو په برخه کې د یو شمېر ترکي خصوصي شرکتونو له مسولینو او د استانبول جراح پاشا پوهنتون استادانو سره په ارګ کې لیدنه کړې.

د دې لیدنې په پیل کې یادو مسولینو او استادانو له خصوصي سکتور سره د اسلامي امارت همکاري ستایلې.

دوی افغانستان او ترکیه د اوږدو اړیکو لرونکي هېوادونه بللي او ویلي يي دي؛ هغه ترکي خصوصي شرکتونه چې د کانونو په برخه کې فعالیت لري، لېواله دي د اسلامي امارت اړوندو ادارو په همکارۍ د افغانستان د کانونو د تحقیق، پلټنې او ایستنې په برخو کې پانګونه وکړي.

د استانبول جراح پاشا پوهنتون استادانو ویلي؛ غواړي د افغانستان لوړو زده کړو وزارت سره د تفاهم لیک په چوکاټ کې د کانونو، کرنې او له طبي وسایلو څخه د استفادې په برخو کې افغان محصلینو ته د رورنې د لنډمهالو او اوږد مهالو بورسونو زمینه برابره کړي.

د استانبول پوهنتون استادانو زیاته کړې؛ موږ چمتو یو په ترکیه کې افغان انجنیرانو ته د سربو، جستو او سرو زرو په څېر معدني موادو د تحقیق، ایستنې او پروسس په اړه د لنډمهاله روزنې زمینه برابره کړو، چې وکولی شي د متخصصینو په توګه د خپل هېواد په پرمختګ او هوساینه کې ګټور تمام شي.

وروسته د ریاست الوزرا دفتر لوی رییس ډاکټر ملا عبدالواسع دوی ته د ښه راغلاست ترڅنګ په بېلابېلو برخو کې له افغانانو سره د ترکیې هېواد د مرستو قدرداني کړې او ویلي يي دي، ترکیه د افغانستان پخوانی دوست دی چې تل د افغانانو ترڅنګ دریدلی.

د ریاست الوزرا دفتر لوی رییس په تېرو ۲۰ کالو کې په افغانستان کې شویو ویجاړیو ته په اشارې ویلي؛ دغه ویجاړي او زیانونه بیارغاونې او ودانولو ته اړتیا لري، چې خوشبختانه د اسلامي امارت په بریا سره په هېواد کې سراسري امنیت ټینګ شوی او په بېلابېلو برخو کې د ودانیزو چارو ترسره کولو او پانګونې ته زمینه برابره شوې ده.

ډاکتر ملا عبدالواسع زیاته کړې؛ اسلامي امارت افغانانو ته د خدمت په برخه کې شپه او ورځ نه ستړې کېدونکي هلې ځلې کوي، په افغانستان کې په ټولو برخو په ځانګړي ډول د کانونو د ایستنې په برخه کې پرمختګونه دوام لري چې له داخلي بودجې تمویلېږي.

نوموړي د خپلو خبرو په پای کې ویلي، اسلامي امارت په بېلابېلو برخو کې له پانګوالو سره همکارۍ ته چمتو دی.

د ریاست الوزرا دفتر لوی رییس له بهرنیو پانګوالو غوښتي، چې په پوره لېوالتیا په افغانستان کې پانګونه وکړي، ځکه اړوند ادارې به د همکارۍ ترڅنګ ورته لازمې اسانتیاوې هم برابرې کړي.

د ریاست الوزرا سیاسي مرستیال مولوي عبدالکبیر په کابل کې د افغان او یو شمېر بهرنیو سوداګرو او پانګوالو د سوداګریز پیوستون په کنفرانس کې ګډون او وینا کړې.

په دې کنفرانس کې د ایران، پاکستان، جاپان، ترکیې او چین ګڼو سوداګرو، پانګوالو، د صنعتي او سوداګریزو خونو مسولینو، د ایران څو تنو سیمه ییزو چارواکو او افغان سوداګرو ګډون کړی وو.

په یاد کنفرانس کې د افغانستان د سوداګرۍ او پانګونې خونې مرستیال محمد یونس مهمند ویلي؛ د افغان او سیمې د یو شمېر سوداګرو ترمنځ ښې اړیکې پیدا شوي او دوی کوښښ کوي، چې له دې لارې د ګډو همکاریو لپاره زمینې وپیژني.

دغه‌راز نوموړي د سیمې له هېوادونو غوښتي، چې د افغان سوداګرو پر وړاندې ستونزې ختمې او سهولتونه رامنځته کړي.

په دې کنفرانس کې د ایران د سیستان بلوچستان د والي مرستیال علیرضا مرحمتي ویلي، په افغانستان کې د اسلامي امارت له لوري د خصوصي سکتور  ملاتړ د پام وړ دی او تر اوسه په هېڅ هېواد کې له سوداګرو څخه دومره ملاتړ شتون نه لري.

وروسته د چابهار بندر د مدیره هیت مشرې حمیرا ریګي په خپلو خبرو کې ډاډ ورکړی، چې هېواد یې د چابهار بندر فعالولو لپاره لازمې اسانتیاوې برابرې کړې دي.

 نوموړې د افغانستان او ایران ترمنځ د سوداګریزو اړیکو پر پراختیا هم ټينګار کړی.

همدارنګه د سوداګرو او پانګوالو د سوداګریز پیوستون په کنفرانس کې د افغانستان د سوداګرۍ او صنعت وزیر نورالدین عزیزي ویلي، اسلامي امارت د سوداګرو هر اړخیز ملاتړ کوي او د چابهار بندر د فعالولو لپاره یې له ایراني لوري سره ګټور بحثونه کړي دي.

وروسته د ریاست الوزرا سیاسي مرستیال مولوي عبدالکبیر په خپلو خبرو کې له کورنیو او بهرنیو سوداګرو د مننې ترڅنګ ویلي، اسلامي امارت هڅه کوي د افغانستان او سیمې د هېوادونو اړیکي په اقتصادي او سوداګریزو همکاریو ودروي او پراخې یې کړي.

مولوي عبدالکبیر زیاته کړې؛ په افغانستان کې په بېلا بېلو سکتورونو کې د پانګونې زمینې شته او له نړیوالو کمپنیو او پانګوالو غواړو، چې په افغانستان کې پانګونه وکړي.

دغه راز د ریاست الوزرا سیاسي مرستیال له ګاونډیو هېوادونو غوښتي، چې د افغان سوداګرو پر وړاندې رامنځته شوي خنډونه او ستونزې له منځه یوسي، ځکه افغان پانګوالو ته د ستونزو رامنځته کول، د لارو بندول او په ناقانونه ډول د مالیاتو لوړول به د افغانستان او ګاونډیو هېوادونو ترمنځ اقتصادي همکارۍ او اړیکې زیانمنې کړي.

سیاسي مرستیال څرګنده کړې، اسلامي امارت د سوداګرۍ په برخه کې په بدیلو لارو هم فکر کوي او غواړي، چې افغانستان له بېلابېلو هېوادونو سره اقتصادي راکړه ورکړه ولري.

مولوي عبدالکبیر ویلي، اسلامي امارت غواړي سیمه ییزه سوداګري ‌او ټرانزیټ پياوړی او پراخ شي، افغانستان پدې برخه کې هر راز همکارۍ ته چمتو دی او اړتیا ده، چې د سیمې هېوادونه هم خپل مسولیت رفع او چمتووالی په عمل کې وښيي.

نوموړي زیاته کړې، اسلامي امارت د ښو اړیکو او تعامل پيغام لري او له هیچا سره جګړه او ستونزه رامنځته کول نه غواړي.

د ریاست الوزرا سیاسي مرستیال له ګاونډیو هېوادونو څخه د افغان کډوالو د کوربتوب له امله د مننې ترڅنګ غوښتنه کړې، چې په افغانستان کې د هوا له سړېدو سره سم دې د افغان کډوالو اجباري ایستل ودرول شي.

غزه کې د فلسطینیانو پر وړاندې د اسرائیلي یرغلګرو د نسل‌وژنې د جګړې یو کال پوره شو.

اسرائیلي رژیم د ۲۰۲۳ زېږدیز کال اکتوبر میاشتې پر ۷مه پر غزه برید وکړ.

په تېر یوه کال کې د اسرائیلي یرغلګرو د بریدونو له امله لږ تر لږه ۴۱ زره او ۹۰۹ فلسطینیان شهیدان شوي، چې په دې سیمه کې له هرو ۵۵ اوسېدونکو کسانو څخه د یوه له منځه تلو سره مساوي دي.

لږ تر لږه ۱۶ زره او ۷۵۶ ماشومان شهیدان شوي، چې په تېرو دوو لسیزو کې د یوې کلنې جګړې تر ټولو ستره ثبت شوې شمېره ده. دغه‌راز له ۱۷ زره زیاتو ماشومانو یو او یا دواړه والدین(مور او پلار) له لاسه ورکړي دي.

اسرائیلي یرغلګرو د نړیوالو له غندنې او د جهاني سازمانونو او بشر حقونو د ادارو له غوښتنو سره-سره غزه کې خپلو وحشتونو ته، چې د غزې په اوسېدونکو کې یې وېره او وحشت خپور کړی او د څو نسلونو کورنۍ یې له منځه وړې دي، دوام ورکړی.

دې تړانګه کې لږ تر لږه ۹۷ زره او ۳۰۳ فلسطینیان ټپیان شوي، چې په هرو ۲۳ کسانو کې له یوه هغه سره مساوي کېږي.

د روغتیا نړیوال سازمان په وینا؛ د ټپيانو نږدې څلورمه برخه چې د اټکل له مخې ۲۲ زره او ۵۰۰ کېږي، داسې ټپیان دي چې د بدن بڼه یې بدله او د بیا جوړېدو امکان یې سخت دی.

د فلسطیني کډوالو لپاره د ملګرو ملتونو ادارې (انراوا) په وینا؛ هره ورځ ۱۰ ماشومان یوه یا دواړه پښې د عملیاتو او قطع کولو له امله په داسې ډول بایللي، چې د اسرائیلو د اوږدې محاصرې له امله د بېهوښي(انستیزي) مواد پوره یا هېڅ نه دي ور رسېدلي.

پر شهیدانو او ټپیانو سربېره له ۱۰ زره زیات فلسطینیان تر کنډوالو او ویجاړیو لاندې دي، چې رضاکاران او د ملکي دفاع کارکوونکي یې د را ایستلو لپاره وسایل هم نه لري او یوازې پخپلو خالي لاسونو تکیه کوي.

د اټکل له مخې غزه کې ۷۵ زره ټنه چاودېدونکي توکي غورځول شوي.

کارپوهان وړاندوینه کوي، چې د دې چاودېدونکو توکو څخه د رامنځته شويو له ۴۲ میلیونه ټنه ډېرو کثافاتو پاکول به، چې ناوچاده توکي به هم پکې شامل وي، کلونه وخت ونیسي.

اسرائیلي یرغلګرو نږدو د غزې په ټولو روغتونونو او روغتیايي مرکزونه بریدونه کړي دي.

په تېر یوه کال کې لږ تر لږه ۱۱۴ روغتونونه او کلینکونه غیرې فعال شوي او ډېری ناروغان اړینو روغتیايي خدماتو ته له لاسرسي محروم شوي دي.

د غزې د رسنیو د دفتر په وینا؛ ۳۴ روغتونونه او ۸۰ روغتیايي مرکزونه غیرې فعال او له کاره لوېدلي، ۱۶۲ روغتیايي بنسټونه د اسرائیلي عسکرو له لوري په نښه شوي او لږ تر لږه ۱۳۱ امبولانسونه په نښه او زیانمن شوي دي.

کارپوهان استدلال کوي، چې په روغتونونو بریدونه نړیوالو قوانینو ته په کتو جنګي جنایت دی.

غزه کې په روغتونونو د اسرائیلي یرغلګرو د بریدونو او بمباریو له امله ۹۸۶ روغتیايي کارکوونکو ژوند بایللی، چې ۱۶۵ ډاکټران، ۲۶۰ نرسان، ۱۸۴ روغتیايي همکاران، ۷۶ درمل جوړوونکي او ۳۰۰ نور اداري کارکوونکي او ملاتړ کوونکي پکې شامل دي.

د لومړۍ کرښې په کارکوونکو کې لږ تر لږه ۸۵ د ملکي دفاع کارمندانو هم ژوند بایللی دی.

له ۷ ډله‌ییزو قبرونو څخه ۵۲۰ جسدونه ترلاسه شوي

صهیونیستي عسکرو غزه کې څو روغتونونه محاصره او سلګونه کسان یې بندیان کړي وو.

د ۲۰۲۴ کال په اپریل کې د خان یونس په ناصر میډیکل کمپلکس کې د ځوانانو، ماشومانو او ښځو ۳۰۰ جسدونه وموندل شول.

همدا میاشت د بيت لاهيا په یوه ښوونځي کې یو بل ډله‌ییز قبر وموندل شو.

په مې میاشت کې د غزې د رسنیو دفتر اعلان وکړ، چې الشفا روغتون کې یو ډله‌ییز قبر موندل شوی، چې جسدونه یې ټوټې-ټوټې شوي.

د غزې د بېړنیو عملیاتو مسولینو ویلي وو، چې د جسدونو لاسونه او پښې تړل شوي او ښکاري، چې ژوندي خښ او یا هم اعدام شوي دي.

۱.۴ میلیونه کسان په ساري ناروغیو اخته شوي

تېر کال د غزې د ۲.۳ میلیونه نفوس ۳/۴ برخه (۷۵ سلنه) وګړي، د فاضله موادو، روغتیايي خدماتو نشتوالي او حفظ الصحې ته د نه لاسرسي له امله په ساري ناروغیو اخته شوي دي.

اسرائیلو غزې ته د روغتیايي توکو مخنیوي له امله لږ تر لږه د ۳۵۰ زره سختو ناروغانو ژوند، چې بېړنۍ درملنې ته اړتیا لري، له ګواښ سره مخ کړی.

لږ تر لږه ۱۰ زره سرطاني ناروغان اړین درمل نشي ترلاسه کولای، حال دا چې لږ تر لږه ۱۵ زره سخت ټپيان او ناروغان له غزې څخه بهر درملنې ته اړ دي.

۹۶ سلنه د خوړو له کمښت سره مخ دي

د جرمونو د نړیوالې محکمې د قانون له مخې، په نړیوالو شخړو او جګړو کې په جبري ډول د یوه ملت یا ټولنې وږي ساتل جنګي جرم دی.

د الجزیرې د موندنو له مخې، اسرائیلي یرغلګرو په سیستیماتیک ډول د غزې وږو خلکو ته د اوبو او مرستو مخنیوی کړی.

د امریکا د بهرنیو چارو وزارت یوه پخواني چارواکو له الجزیرې سره په خبرو کې ویلي؛ دا امریکا او مرستندویه ادارو ته روښانه او مستنده ده، چې اسرائیل غزې ته مرستې نه پرېږدي.

لږ تر لږه ۲.۱۵ میلیونه یا د غزې ۹۶ سلنه وګړي د لوږې له سخت بحران سره مخ دي.

د اوبو ۷۰۰ څاه‌ګانې ویجاړې شوې

د ‘انرا’ په نوم د غیرې انتفاعي سازمان په وینا؛ د ۲۰۲۴ په مارچ میاشت کې د غزې ۹۵ سلنه وګړو څو میاشتې د څښاک پاکو اوبو ته لاسرسی نه درلود.

په ټوله غزه کې په ورځني ډول هر وګړي ته یوازې ۱.۵ نه تر ۱.۸ لیټره پورې اوبه رسېږي، حال دا چې د روغتیا نړیوال سازمان هر وګړي ته په ورځني ډول د ۱۰۰ لیټره پاکو اوبو وړاندیز کوي.

له بده‌مرغه د غزې اوسېدونکي د ناپاکه او مالګینو اوبو څښلو او په سیند کې د خپلو کالیو مینځلو ته اړ شوي دي.

له ۱۳۰ ډېرو خبریالانو ژوند بایللی

د راپورونو له مخې د اکتوبر له ۷مې راهیسې له ۱۳۰ ډېرو خبریالانو، چې نږدې ټول یې فلسطینیان دي، ژوند بایللی.

د غزې د رسنیو دفتر بیا د خبریالانو مړینه ۱۷۵ ګڼي، چې د اکتوبر له ۷مې راهیسې په اوسط ډول هره اونۍ څلورو خبریالانو ژوند بایللی.

زرګونه فلسطینیان د اسرائیلو په زندانونو کې بندیان دي

له ۱۰ زره زیات فلسطینیان د اسرائیلي په زندانو کې بندیان او له سخت حالت سره مخ دي، چې لږ تر لږه ۲۵۰ ماشومان او ۸۰ ښځې هم پکې شاملې دي.

د غزې ډېره برخه ویجاړه شوې

د اټکل له مخې غزه کې ۷۵ زره ټنه چاودېدونکي توکي غورځول شوي.

کارپوهان وړاندوینه کوي، چې د دې چاودېدونکو توکو څخه د رامنځته شويو له ۴۲ میلیونه ټنه ډېرو کثافاتو پاکول به، چې ناوچاده توکي به هم پکې شامل وي، کلونه وخت ونیسي.

د غزې د رسنیو دفتر وايي، چې په دې تړانګه د اسرائيلي یرغلګرو د بریدونو له امله ۳۳ میلیارده ډالر زیان اټکل شوی دی.

۱۵۰ زره کورونه په بشپړ ډول ویجاړ شوي

د اوچا د راپور له مخې، په جنوري میاشت کې د غزې ۶۰ سلنه استوګنیز کورونه او ۸۰ سلنه سوداګیز تاسیسات زیانمن او یا ویجاړ شوي دي.

د غزې د رسنیو دفتر د اټکل له مخې، ۱۵۰ زره کورونه په بشپړ ډول ویجاړ او له ۳ زره کیلو متره ډېر برېښنايي شبکې له منځه وړل شوي دي.

۱۲۳ ښوونځي او پوهنتونونه په بشپړ ډول له منځه وړل شوي

غزه کې د ګڼو کورونو له ویجاړولو وروسته، سلګونه ښوونځي د فلسطینیانو په پناه ځایونو بدل شوي او لږ تر لږه د غزې ۶۲۵ زره ماشومان له زده‌کړو محروم دي.

په تېر یوه کال کې اسرائیلو ۱۲۳ ښوونځي او پوهنتونونه په بشپړ ډول ویجاړ او لږ تر لږه ۳۳۵ نور یې زیانمن کړي دي.

پر دې سربېره لږ تر لږه ۱۱ زره او ۵۰۰ زده‌کوونکي او ۷۵۰ ښوونکي او ښوونیز کارکوونکي شهیدان شوي دي.

په جوماتونو او فرهنګي ځایونو بریدونه

تېر کال د غزې لږ تر لږه ۲۰۶ لرغوني او فرهنګي ځایونه هم تخریب شوي دي.

دغه‌راز د اسرائیلي یرغلګرو په بریدونو کې لږ تر لږه ۶۱۱ جوماتونه په بشپړ ډول ویجاړ او ۲۱۴ نور تخریب شوي دي.

د ډسمبر پر ۸مه د غزې لوی عمري جومات د اسرائیلي یرغلګرو په هوايي برید کې سخت زیانمن شو. د دې جومات ۷۴۷ کلن زوړ کتابتون، چې یو وخت د قرانکریم د پخوانیو نسخو په ګډون نادرې او کمیابه نسخې پکې ساتل کېدې، په کنډوالو بدل شو.

۴۱۰ ورزشکارانو، سپورتي چارواکو یا روزونکو ژوند بایللی

اسرائیلي یرغلګرو لږ تر لږه ۳۴ سپورتي تاسیسات، لوبغالي او جیمونه ویجاړ کړي دي.

د فلسطین د فوټبال اتحادیې د راپور له مخې، تر اګسټ میاشتې د اسرائیلي په بریدونو کې لږ تر لږه ۴۱۰ ورزشکارانو، سپورتي چارواکو یا روزونکو ژوند بایللی.

په دوی کې ۲۹۷ فوټبالران و، چې ۸۴ ماشومان هم پکې شامل و او د فلسطین لپاره یې د لوبېدو خوبونه لېدل.

سرچینه: الجزیره

د ملي دفاع وزارت اړوند د عبدالله بن مسعود رضي الله عنه د جګړه ايزو ګډو زده کړو قوماندانۍ د مرکزي قطعاتو او سیمه ایزو قول اردوګانو ۷۵ تنه ځوان منسوبین د جګړه ایزو تامیناتو او جګړه ایز ملاتړ ښوونځیو له مسلکي زده کړو څخه د یو لړ مراسمو په ترڅ کې فارغ شول.

په دې اړه جوړو شویو مراسمو کې د عبدالله بن مسعود رضي الله عنه د جګړه ایزو ګډو زده کړو قوماندان مولوي نصیب الله مدني او ګڼ شمیر نورو مسولینو او منسوبینو ګډون کړې وو.

مولوي نصیب الله مدني فارغانو ته د مبارکۍ تر څنګ د اِعداد، اطاعت او تقوا په هکله هر اړخیزه وینا وکړه او ويي ویل؛ په لنډ مهالو زده کړو بسنه مه کوئ، هڅه وکړئ په خپلو مسلکي برخو کې نور مهارتونه هم زده کړئ او له وظیفوي غفلت څخه ځان وساتي.

ورته مهال نویو فارغانو د هېواد په هر ګوټ کې اسلامي نظام ته د خدمت کولو په موخه چمتووالی ښودلی.