د ریاست‌الوزرا اقتصادي مرستیال ملا عبدالغني برادر اخوند د روان ۱۴۰۳ لمریز کال د سنبلې میاشتې په لومړۍ نېټه پخپل کاري دفتر کې د کویټ هېواد له یوشمېر پانګوالو سره لیدنه کړې.

په دې لیدنه کې د اوبو او انرژۍ وزیر ملا عبداللطیف منصور هم حضور درلود.

دواړو لوریو په افغانستان کې د پانګونې او سوداګرۍ په تړاو خبرې کړې دي.

د کویټ هېواد پانګوالو ویلي، چې افغانستان اوسمهال د پانګونې لپاره په یو مناسب هېواد بدل شوی او دوی لېواله دي، چې دلته په مختلفو برخو پر پانګونې سربېره د سوداګرۍ په برخه کې هم فعالیت وکړي.

یادو پانګوالو زیاته کړې؛ دوی غواړي چې افغانستان کې د هغو مرستو لپاره هم یو پياوړی بنسټ جوړ کړي، چې د اسلامي هېوادونو د ملتونو له لوري ورکول کېږي.

د دوی په خبره، دغه بنسټ به له اسلامي امارت سره په همغږۍ یادې مرستې د بېوزلو افغانانو په لاس نیوي او پراختیايي برخو کې لګوي چې له امله به یې نوي کاري فرصتونه او د زېربنا په برخه کې پرمختګ رامنځته شي.

د ریاست‌الوزرا اقتصادي مرستیال افغانستان کې د کویټ هېواد د پانګوالو له پانګونې، دلته د سوداګرۍ په برخه کې له فعالیت او همدا راز په پراختیايي برخو کې د یو قوي بنسټ له رامنځته کېدو هرکلی کړی او دوی ته یې ډاډ ورکړی، چې اسلامي امارت یې پوره همکاري او ملاتړ کوي.

د ٢٠١ خالد بن ولید (رض) قول اردو د عبدالله بن مسعود (رض) دریمې پلې لوا د لومړي پياده او څلورم حمايوي کنډکونو منسوبینو او پرسونل له سلګونه کورنیو سره بیړنۍ مرسته کړې.

د یادو کنډکونو منسوبینو او پرسونل له شته امکاناتو څخه په استفادې د خوګياڼو ولسوالۍ اړوند چمتلې، سره رود ولسوالۍ بېلابېلو ساحو او د جلال اباد ښار په مختلفو سیمو کې په سيلابونو کې بند پاتې سلګونه کورنۍ ژغورلې او د ثقیله پوځي وسایطو په ذريعه یې خوندي ځایونوته انتقال کړيدې.

ورته مهال د يادو کنډکونو منسوبینو او مسلکي پرسونل د انجنیری وسايطو لوډر، بلډوزر او نورو وسایطو په واسطه ځينو ساحو کې د سیلاب مخه بنده کړې، ترڅو د لازياتو زيانونو اوښتو مخنيوی وشي.

مولوي حمدالله زاهد د یوې غونډې په ترڅ کې د عامې روغتیا وزارت د خوړو او درملو معینیت د نوي مرستیال په توګه وټاکل شو.

په همدې موخه جوړه شوې غونډه کې د افغانستان اسلامي امارت د چارو ادارې لوی رییس شیخ الحدیث مولوي انورالحق انور، د عامې روغتیا وزیر مولوي نور جلال جلالي، د وزارت مرستیالانو، مرکزي رییسانو او د بېلا بېلو امارتي ادارو استازو کډون کړی و.

د چارو ادارې لوی رییس شیخ الحدیث انورالحق انور تغیر او تبدیل او د اوامرو څخه اطاعت کول د نظام اصل یاد کړی او ویلي یې دي، چې د عالیقدر امیرالمؤمنین حفظه الله د حکم پر اساس مولوي حمدالله زاهد د عامې روغتیا وزارت د خوړو او درملو معینیت د مرستیال په توګه وټاکل شو، تر څو له دې وروسته د یادې برخې چارې پر مخ یوسي.

نوموړي د عامې روغتیا وزارت د خوړو او درملو معینیت نوي مرستیال ښاغلي مولوي حمدالله زاهد او د یاد معینیت مخکیني مرستیال ښاغلي ډاکټر عبدالباري عمر ته په چارو کې د بریالیتوب هیله څرګنده کړې او په اړوندو برخو کې یې هېوادوالو ته د خدمت غوښتنه ترې کړې ده.

مولوي نور جلال جلالي ویلي؛ د شکر ځای دی، چې په ټول هېواد کې یو اسلامي نظام حاکم دی او ټول د یو امیر د اوامرو اطاعت کوي.

د عامې روغتیا وزارت د خوړو او درملو نوي ټاکل شوي مرستیال د خپلو کاري برنامو په اړه ګډونوالو ته معلومات وړاندې کړي او ویلي یې دي، چې موږ د امیرالمؤمنین حفظه الله د اوامرو څخه په اطاعت هڅه کوو، تر څو د اسلامي نظام د اصولو او قوانینو له مخې خپلو هېوادوالو ته د خدمت مصدر وګرځو.

د افغانستان اسلامي امارت عدلیې وزارت د امر بالمعروف او نهی عن المنکر قانون د عالیقدر امیرالمومنین حفظه الله تعالی له لوري له توشیح څخه وروسته د ۱۴۴۶ هجري قمري کال د محرم الحرام د میاشتې په ۲۵ نېټه ۱۴۵۲ ګڼه رسمي جریده کې خپور کړ.

د امر بالمعروف او نهی عن المنکر په قانون کې یوه مقدمه، ۴ فصلونه او ۳۵ مادې شاملې دي، چې د عالیقدر امیرالمومنین حفظه الله تعالی له لوري له توشیح څخه وروسته نافذ او په رسمي جریده کې خپور شوی دی.

دا قانون د امر بالمعروف او نهی عن المنکر د اړوند چارو او د محتسبینو د دندو او صلاحیتونو تنظیمولو په موخه جوړ او تدوین شوی، چې د تطبیق مرجع یې د امربالمعروف، نهی عن المنکر او د شکایتونو اورېدولو وزارت دی.

د یاد قانون له مخې دا وزارت د اسلامي شریعت او حنفي فقهې له مخې په معروفاتو په امر کولو او له منکراتو څخه په منع کولو مکلف دی او د خلکو ترمنځ د سولې او ورورولۍ په تامینولو او له قومي، ژبنيو او سمتي تعصباتو څخه په منع کولو مکلف شوی دی.

په دې قانون کې د احتساب آداب او اصول بیان شوي او پکې راغلي، چې د اشخاصو شخصیت او انساني کرامت رعایتول او له هغوی سره ښه چلند، په نرمۍ سره وعظ او نصیحت، د لیدلو او اوریدلو وړ منکراتو څخه منع کول، د اشخاصو د پټو ګناهونو له څرګندولو څخه ډډه کول او له تجسس او د اشخاصو حریم ته له داخلیدلو څخه ډډه کول، خو که اسلامي شریعت اجازه ورکړې وي، د دغو اصولو له جملې څخه دي.

د یاد قانون په یوه برخه کې د حجاب اړوند حکمونه بیان شوي او د ښځې د ټول بدن ستر لازمي او د فتنې د وېرې له کبله د مخ پټول پکښې ضروري ویل شوي دي.

په دې قانون کې د نارینه‌وو د عورت د ستر څرنګوالی هم د شریعت په اساس مشخص شوی او محتسبان مکلف شوي، ترڅو د نارینه‌وو او ښځو د عورت د ستر اړوند امربالمعروف او نهی عن المنکر وکړي.

په دې قانون کې خلک او د امارتي ادارو کارمندان اسلامي شعایرو ته په تعظیم مکلف کول، له شریعت سره سم د مطالبو په خپرولو د رسنیو د مسولینو مکلف کول، مطالبو کې مسلمان ته د سپکاوي په نه‌شتون او داسې مطالب خپرول چې د ذي‌روح (ساه‌لرونکي) انځورونه پکښې نه‌وي، په جماعت سره د لمانځه په ادا کولو، په وخت د عشر، زکات او نورو مالي مکلفیتونو په ورکړې د سوداګرو، کسبګرو او بزګرانو مکلف کول، له ربا، احتکار، غش، قسم خوړلو، تطفیف، دروغ او نورو غیرشرعي اعمالو څخه د هغوی منع کول او د حرامو شیانو یا غیرقانوني شیانو پلورلو څخه د هغوی منع کول، د محتسب مسئولیتونه بلل شوي دي.

دغه راز د یاد قانون په اساس محتسبان مسولیت لري ترڅو د وسایطو چلوونکي د موسیقۍ له غږولو، د نشه‌یې توکو له کارونې، د بې حجابه ښځو له لېږدونې، له نامحرمو نارینه‌وو سره د ښځو د ناستې او اختلاط زمینې له برابرولو او له عاقل او بالغ شرعي محرم څخه پرته د ښځو له لېږدونې منع کړي او د دغو مواردو په تطبیق هغوی مکلف کړي.

په دې قانون کې زنا، هر ډول قمار او منکراتو لپاره زمینه برابرول، د حیواناتو جنګول، له ټایپ، راډیو او نورو وسایلو څخه غلطه ګټه اخیستنه، په کمپیوټر، موبایل او دغه شان نور شیانو کې د ذي‌روح شیانو انځور جوړول او کتل، د مسکراتو کارونه، رانیول، خرڅول، ساتنه او قاچاق، بې حجابي کول، او د عورت لوڅول، د لمانځه پرېښوول او قضاء کول، د روژې خوړل، د ږیرې خرېیل او تر قبضې کمول، د اسلامي شریعت پر خلاف د وېښتانو جوړول، له کفارو سره دوستي او مرسته او له هغوی سره د صورت او سیرت ورته والی او نور څو موارد د ځانګړو منکراتو له جملې بلل شوي چې محتسبان یې پر مخنیوي مکلف دي.

د امر بالمعروف او نهی عن المنکر په قانون کې هغو اشخاصو لپاره چې په ښکاره ډول منکر عمل ترسره کوي، معصیت او مرتکب ته یې په کتلو سره تعزیرات لکه توصیه، د الله له عذاب څخه تخویف (ویرول)، په قهرجنو الفاظو تنبیه او تهدید، منکر عمل کوونکي ته په تلف د مال سره تعزیر ورکول، له یو ساعت څخه تر درې ورځو پورې حبس په عمومي محابسو کې او په پای کې هغه سزا چې د محتسب له لوري مناسبه وګڼل شي، په پام کې نیول شوي دي او د قانون په اساس، په هغه صورت کې چې د دغو تعزیراتو په تطبیق سره شخص اصلاح نه‌شي، محکمې ته ورپېژندل کېږي.

د یادونې وړ ده چې په ۱۴۵۲ ګڼه رسمي جریده کې، د امر بالمعروف او نهی عن المنکر قانون سربېره، د عالیقدر امیرالمومنین حفظه الله تعالی فرمان چې د لمانځه په اړه توصیې په کې شاملې دي هم چاپ او خپور شوی دی.

درانه هېوادوال کولای شي دغه ګڼه رسمي جریده په چاپ شوې بڼه د عدلیې وزارت د خپرونو او عامه اړیکو له ریاست څخه د ټاکل شوې بیې په بدل کې او په وړیا توګه د سافټ (پي ډي اف) په بڼه د عدلیې وزارت د ویب پاڼې د حکمونو او قوانینو له دیتابیس څخه ترلاسه کړي. د یاد قانون د چاپ حق د عدلیې له وزارت سره محفوظ دی او غیر قانوني چاپ یې ممنوع دی.

د افغانستان اسلامي امارت د عامې روغتیا وزیر مولوي نور جلال جلالي پخپل کاري دفتر کې د افغانستان لپاره د روغتیا نړیوال سازمان له مشر ښاغلي ایډوین سینیزا سلاوډر، د یونیسیف دفتر له مشر ښاغلي ډاکټر تاج الدین اوېلا او د کډوالۍ نړیوال سازمان له مسولینو سره ګډه ناسته کړې.

په دې ناسته کې افغانستان کې د بیزو تڼاکې (مانکي پاکس) ناروغۍ څخه د مخنیوي او د کنټرول لپاره یې د اړینو تدابیرو نیولو، د اړوند ادارو ترمنځ پر ګډه همغږۍ، د تجهیزاتو پر برابرولو او د یادې ناروغۍ د درملنې اړوند بحث او خبرې شوې.

مولوي نور جلال جلالي په دغه ناسته کې د نړیوالو سازمانونو له استازو سره د ساري ناروغیو په ځانګړې توګه د مانکي پاکس ناروغۍ په کنټرول ټینګار کړی او ویلي یې دي؛ هڅه کوو هېواد ته د ټولو هغه ساري ناروغیو د انتقال مخنیوی وکړو، چې د هېوادوالو روغتیا او ژوند له ګواښ او خطر سره مخ کوي.

نوموړي په همدې موخه د یادو سازمانونو همکاري اړینه ګڼلې او له استازو یې غوښتي، تر څو په دې برخه کې د عامې روغتیا وزارت سره خپلې همکارۍ ته دوام ورکړي.

په دې سربېره یوې ځانګړې کمېټې ته دنده سپارل شوې، چې د اړوندو ادارو ترمنځ د دوامداره همغږۍ او ګډ کار په مرسته دې د دغه ناروغۍ د مخنیوي اړوند لازم اقدامات ترسره کړي.

په کابل کې د اروپايي ټولنې پخوانۍ استازې رافیلا یودیچې د بهرنیو چارو وزارت له سیاسي مرستیال شیر محمد عباس ستانکزي سره د مخه ښې لیدنه کې کابل کې د اروپايي ټولنې د نوې شارژدافیرې په توګه د بوسکوویچ پوهر ویرانیکا د ټاکل کېدو خبر ورکړی.

دې لیدنه کې اغلې یودیچې ویلي؛ د افغانستان په اړه د هېوادونو له سفارتونو سره په مفصله ناسته کې د ګډون په موخه به لومړی دوحې ته سفر وکړي او وروسته به بروکسل کې د اروپايي ټولنې له چارواکو سره د افغانستان په اړه غونډه وکړي.

دغه راز دې غونډه کې ښاغلي ستانکزي له افغانستان سره په بېلابېلو برخو کې د اروپايي ټولنې د مرستو مننه کړې او نوموړې ته یې د هر راز همکارۍ ډاډ ورکړی دی.

د قزاقستان بهرنيو چارو وزارت د یوې اعلامیې په خپرولو سره ویلي، چې دغه هېواد کې یې د اسلامي امارت د شارژدافیر محمد الرحمن رحماني باورلیک منلی دی.

یاده اعلاميې کې راغلي، د قزاقستان د بهرنیو چارو وزارت مرستیال علی بیک باکایف له ښاغلي رحماني سره په کتنه کې ویلي، چې دغه چاره به د دواړو هېوادونو ترمنځ د سوداګریزو، اقتصادي او بشرپاله اړیکو کې د لا پراختیا لامل شي.

د یادونې وړ ده، چې د متحده عربي اماراتو بهرنیو چارو وزارت هم پرون (چهار شنبه، د زمري ۳۱مه) په ابوظبۍ کې د افغانستان د سفیر په توګه د مولوي بدرالدین حقاني باور‌لیک ومانه.

له دې وړاندې چین هم په رسمي توګه د اسلامي امارت سفیر منلی او قزاقستان له متحده عربي اماراتو وروسته درېیم هېواد شو، چې د اسلامي امارت استازی په رسمي ډول مني.

د اطلاعاتو او کلتور وزير ملا خیرالله خیرخواه د قطر هېواد د سفارت له سلاکار مردف القاشوطي سره په خپل کاري دفتر کې لیدنه کړې.

د قطر هیواد د سفارت سلاکار افغانستان کې د سراسري امنيت او سولې د یادونې ترڅنګ د نظام په مختلفو برخو کې شوي پرمختګونه ستایلي او ویلي یې دي، چې اسلامي امارت په لنډ وخت کې ډیر زیات پرمختګ کړی.

ملا خير الله خيرخواه نوموړي ته د ښه راغلاست ويلو ترڅنګ ویلي، چې یاد پرمختګونه باید د نړۍ سره شریک شي، تر څو نړیوال د افغانستان واقعي انځور وویني.

نوموړي زیاته کړې، چې قطر هيواد دې د افغانستان د تاريخي اثارو لپاره د نندارتونونو د جوړلو او افغان ځوانانو ته د روزنیزو سیمینارونو برابرولو برخه کې همکاري وکړي.

ښاغلي مردوف القاشوطي په یادو برخو کې د همکارۍ ژمنه کړې ده.

د افغانستان اسلامي امارت د ریاست الوزرا سیاسي مرستیال مولوي عبدالکبیر کابل کې د اروپايي ټولنې له شارژدافیرې رافیلا یودیجي سره د مخه ښې لیدنه وکړه.

په دې ناسته کې اغلې رافیلا یودیجي په کابل کې د اروپايي ټولنې له استازو او دفتر سره د اسلامي امارت د همکارۍ مننه کړې او ویلي یې دي، چې د اسلامي امارت د همکارۍ له امله د اروپايي ټولنې استازي توانیدلي چې افغانانو ته ډېرې مرستې راټولې کړي.

نوموړې دغه راز له افغانانو سره د اروپايي اتحادیې د همکاریو او مرستو د دوام ډاډ ورکړی او زیاته کړې یې ده؛ دا ټولنه کوښښ کوي چې د دوحې د درېیمې ناستې شوې ژمنې عملي شي.

دغه‌رازاروپايي ټولنه د افغانستان له پوهنیز سیستم سره مرستو او د ښوونځیو رغاولو ته چمتو ده.

اغلې رافیلا په دوحه کې له مېشتو یو شمېر لویدیځو ډیپلوماتانو سره د ریاست الوزرا د سیاسي مرستیال وروستۍ ناسته ګټوره او د ډېرو موضوعاتو د حل او اندېښنو د لرې کولو په برخه کې اغېزناکه بللې ده.

د اروپايي ټولنې د شارژدافیرې په وینا؛ افغانستان کې وضعیت او پرمختګونه مثبت لوري ته روان دي او کوښښ به وکړي، چې د افغانستان وضعیت د اروپايي ټولنې غړو هېوادونو سره شریک کړي.

د ریاست الوزرا سیاسي مرستیال مولوي عبدالکبیر په هېواد کې د اروپايي ټولنې د شارژدافیرې ماموریت ګټور بللی او ویلي یې دي، چې د بشري مرستو په برخه کې د اروپايي ټولنې ونډه د پام وړ ده.

نوموړي زیاته کړې، چې د اسلامي امارت دريځ په تعامل، متقابل احترام او همکاریو ولاړ دی.

دغه‌راز اسلامي امارت له نړۍ سره پر کړو ژمنو عمل کړی او دا مهال د نشه‌یي توکو کښت صفر شوی، اداري فساد پای ته رسیدلی، د روږدو کسانو درملنه دوام لري او له افغانستان څخه هېچاته خطر متوجه نه دی.

سیاسي مرستیال په کابل کې د اروپايي ټولنې د ډپیلوماټیک حضور په ستایلو سره ویلي، چې اسلامي امارت هیله لري ژر تر ژره د دوحې د درېیمې ناستې شوې ژمنې عملي شي.

مولوي عبدالکبیر نوموړې ته په خطاب کې ویلي، چې له نړۍ او د اروپايي اتحادیې له مسولینو سره دې د افغانستان او اسلامي امارت رښتینی وضعیت شریک کړي.

د مهاجرینو ستونزو ته د رسېدنې عالي کمېسیون دارالانشا

د کمېټو ورځنی کاري راپور

د چهارشنبې ورځ، د ۱۷/۲/۱۴۴۶ هـ ق نېټه چې ۳۱/۵/۱۴۰۳ هـ ش نېټې سره سمون خوري، د هېواد له مختلفو لارو څخه افغان مهاجرین راستانه شوي او په بېلابېلو برخو کې ورته اړین خدمتونه وړاندې شوي چې بشپړ راپور یې په لاندې توګه وړاندې کیږي:

ننـــــــــګرهــــــار

تورخم (ډېورنډ فرضي کرښه)

نن د تورخم له لارې (۳۶) کورنۍ هېواد ته راستنې او د یادو کورنیو (۲۱۰) تنه غړي ثبت او بایمیټریک شوي دي.

د ټرانسپورټ او لېږد کمېټه:

له تورخم څخه (۲۵) کورنۍ چې د غړو شمېر یې (۱۵۷) تنه و، ننګرهار او کابل ولایتونو ته په خوندي توګه لېږدول شوي او یادو کورنیو ته (۹۱۰۰۰) افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو تنظیم کمېټې لخوا له (۴۲) کورنیو سره مرسته وشوه، چې مجموعاً (۳٦۸۰۰۰) افغانۍ کیږي.

کنــــــــــــــدهار

سپین بولدک (ډیورنډ فرضي کرښه)

د ثبت، تثبیت او استقبال کمېټه:

نن د سپین بولدک له لارې (۲۲) کورنۍ چې د غړو شمیر یې (۱۲۵) تنه کیږي، هېواد ته راستنې او ثبت شوي دي.

د ټرانسپورټ او لېږد کمېټه:

نن له سپین بولدک څخه (۵) کورنۍ چې د غړو شمېر یې (۲۸) تنه و، پکتیکا او کابل ولایتونو ته په خوندي توګه ولېږدول شوې او (۱۴۵۰۰) افغانۍ کرایه هم ورکړل شوې ده.

د مالي چارو د تنظیم کمېټه:

د مالي چارو د تنظیم کمېټې له لوري نن په تخته پل کمپ کې له (۲۲) کورنیو سره مجموعاً (۱۹۴۰۰۰) افغانۍ مرسته وشوه.

د لنډمهالې مېشتېدنې کمېټه:

نن (۹) کورنۍ د تخته پل مېشتېدنې په لنډ مهاله کمپ کې مېشتې کړل شوې.

د خدماتو او روغتیايي چارو کمیټه:

په سپین بولدک کې راستنېدونکو مهاجرینو ته د روغتیا په شمول لاندې بېلابېل خدمات وړاندې شول:

غذا: په سپین بولدک کې مهاجرینو ته (۲۰۱) خوراکه ډوډۍ او پاکې اوبه ورکړل شوې.

روغتیا: په سپین بولدک کې (۱۵۸) تنه راستانه شوي مهاجرین تداوي شوي دي.

همدارنګه (۴٦٦) تنه مهاجرینو ته د روغتیا په بېلا بېلو برخو کې عامه پوهاوی ورکړل شوی دی.

البسه: په لنډ مهاله کمپونو کې د اړتیا سره سم مهاجرینو ته خیمې، کمپلې او توسان وېشل شوي دي.

مخابرات: د مخابراتي خدمتونو د ادارې له لوري راستنو شویو مهاجرینو ته (۱۷۰) عدده سیمکارتونه په وړیا توګه چې وړیا دقیقې او د انټرنټي بستې هم په کې فعاله وې، وېشل شوي دي.

نیمروز

ورېښمو لار

د ثبت، تثبیت او استقبال کمېټه:

د ورېښمو له لارې نن (٦۵) کورنۍ چې د غړو شمېر یې (۲۲۵) تنه و، هېواد ته راستنې او ثبت شوې دي او همدا راز (۱۱۰۴) تنه مسافر وطن ته راغلي دي.

د مالي چارو د تنظیم کمېټه:

د مالي چارو د تنظیم کمېټې له لوري نن له (۵۵) کورنیو سره مجموعاً (۳٦۸۰۰۰) افغانۍ مالي مرسته شوې.

د لنډمهالې مېشتېدنې کمېټه:

نن په نیمروز کې (۷٦) کورنۍ د مېشتېدنې په لنډ مهاله کمپ کې مېشتې کړل شوې.

د خدماتو او روغتیايي چارو کمېټه:

په نیمروز کې راستنېدونکو مهاجرینو ته نن د روغتیا په شمول، بېلابېل خدمات وړاندې شول:

مخابرات: راستنو شویو مهاجرینو ته (٦۵) عدده سیمکارتونه، په وړیا توګه چې وړیا دقیقې او انټرنېټي بستې هم په‌کې فعاله وې، وېشل شوي دي.

د اطلاعاتو او عامه پوهاوي کمېټه:

د نیمروز ولایت ورېښمو بندر کې مهاجرینو ته عامه پوهاوی ورکړل شو. یادو مهاجرینو ته د دوی د ثبت، لېږد، مالي مرستو، لنډ مهاله مېشتېدنې او همدرانکه د هېواد، اسلامي نظام، مهاجرت، صبر او زغم، ښوونې او روزنې په اړه ګټور پوهاوی ورکړل شو.

هـــــــرات

اسلام کلا

د ثبت، تثبیت او استقبال کمېټه:

نن د اسلام کلا له لارې (۸۱) کورنۍ چې د غړو شمیر یې (۱۷۲) تنه کیږي، هېواد ته راستنې او ثبت شوي دي.

د مالي چارو د تنظیم کمېټه:

د مالي چارو د تنظیم کمېټې له لوري نن په اسلام کلا بندر کې له (۹۰) کورنیو سره مجموعاً (٦۱٦۰۰۰) افغانۍ مرسته وشوه.

د لنډمهاله مېشتېدنې کمېټه:

هرات کې نن (۷۴) کورنۍ د مېشتېدنې په لنډ مهاله کمپ کې مېشتې کړل شوې.

د ټولو کمېټو د بېلابېلو کړنو ټولیز ارقام په لاندې توګه دي:

ثبت شوي مهاجرین: (۱٦۸) کورنۍ، (۵۲۲) افراد

لېږدول شوي مهاجرین: (۳۰) کورنۍ، (۱۷۵) افراد

مرسته شوي مهاجرین: (۲۰۹) کورنۍ

لنډمهالي مېشت شوي مهاجرین: (۱۵۹) کورنۍ

وېشل شوي سیمکارتونه: (۲۳۵) عدده

د مهاجرینو ستونزو د رسېدنې عالي کمېسیون دارالانشاء